Siglir tar il cuntegn

Header

cuntegn

Vischnanca da Glion Deficit da passa in milliun francs tar preventiv 2024

La vischnanca da Glion è en las stretgas finanzialas. Tenor las prognosas da l'administraziun serra ella gia il quint 2023 cun in deficit pli grond che previs ed il budget per il quint da l'onn proxim preveda in deficit da radund 1 milliun francs. La raschun principala: ils custs da sanadad.

Bain che la vischnanca da Glion aveva per l'onn 2023 previs in pign deficit en ses preventiv crescha quel per l'onn 2024 marcantamain. Las raschuns principalas: la vischnanca ha da pajar en ils onns 2023 e 2024 radund 1,2 milliuns francs per sustegnair l'ospital regiunal Surselva. Er las contribuziuns annualas a las chasas d'attempadas ed attempads ston vegnir augmentadas per var 370'000 francs. Latiers vegnia anc la chareschia tar las pajas dal persunal communal ed auters facturs che fan, ch'il deficit tar il quint da gudogn e perdita tenor budget munta var 1 milliun francs.

Stritgar ni stuschar investiziuns per «spargnar»

La vischnanca da Glion ha fatg la proposta d'investir var 6 milliuns francs nets en l'onn 2024. Sin proposta da la cumissiun da finanzas ha il parlament stritgà ni stuschà investiziuns d'ina summa totala da varga 1 milliun francs. Uschia vegn stuschà la sanaziun da l'anteriura chasa communala da Schnaus ed er il stgaudament da la «Casa Sentupada» a Siat sto spetgar sin ina sanaziun. Ultra da quai datti en l'onn nagins daners per novas ovras idraulicas per aua da baiver. Er la summa da 40'000 francs per la via per mountainbikes «Crest Tiarms-Glion» giu da Ruschein è stritgada.

audio
Vischnanca da Glion stritga investiziuns per spargnar
ord Actualitad dals 29.11.2023. Maletg: RTR
laschar ir. Durada: 3 minutas 49 Secundas.

Refusà auzament da taglia sin immobiglias

Il parlament communal da Glion ha ier saira refusà la dumonda da la suprastanza, d'auzar la taglia sin immobiglias da 1 sin 1,5 promil. Cun 21 vuschs encunter 1 ha ella cleramain detg Na a la fatschenta. La dumonda da la suprastanza da reveder parzialmain la lescha da taglia ha gì nagina schanza. La suprastanza avess gugent auzà quella taglia, vesend che la situaziun finanziala da la vischnanca saja difficila, sco il president communal da Glion, Marcus Beer, ha ditg durant la sesida dal parlament. Exponents dal parlament han argumentà ch'in auzament tutgia las possessuras ed ils possessurs da chasas e l'ultim las locatarias ed ils locataris. Il parlament ha uschia decidì da desister sin quellas entradas supplementaras da taglia.

Nagina festa da giubileum

L'onn proxim na datti definitivamain betg ina festa da giubileum da 10 onns fusiun. Suenter ch'il parlament da Glion aveva refusà in credit da radund 345'000 francs l'avrel passà, aveva il parlamentari Ivo Capaul anc fatg quest atun ina dumonda da pudair far ina festa cun in budget pli modest da 100'000 francs. La dumonda per quest credit ha il parlament refusà cun 16 encunter 7 vuschs.

audio
Per tadlar: las novitads da las 06:00
ord RTR Audio dals 30.11.2023.
laschar ir. Durada: 5 minutas 52 Secundas.

RTR actualitad 12:00

Artitgels legids il pli savens