La primavaira han las vischnancas da Mustér, Tujetsch, Andermatt, Hospental e Realp lantschà la Golden Card. Quella custa 333 francs e per quella pon tuttas abitantas ed abitants da quellas vischnancas profitar d'ina fulla favurs. Tranter auter l'abunament d'ir cun skis, la Viafier Matterhorn Gottard durant l'enviern da Mustér ad Andermatt u il Center Fontauna ed il Bogn Sedrun.
Apparentamain ha quella purschida attratg l'interess da bleras e blers vischins da las tschintg vischnancas. Ma betg mo da quellas e quels: Er a Medel e Sumvitg è vegnì discutà davart la carta. A Sumvitg è vegnì lantschà ina petiziun per sa participar a la Golden Card ed a Medel ha la giuventetgna inizià ina discussiun en quest connex e quai cun success: Per las abitantas ed ils abitants da la vischnanca da Medel è vegnì creà entaifer curt temp in sumegliant product sco la Golden Card. Il Pass Medelin ha vigur a partir dal prim da schaner 2026.
500 francs per abitant
Cun occasiun da la davosa radunanza communala è il model per il Pass Medelin vegnì preschentà. Ina gruppa da lavur installada da la vischnanca ha elavurà in model sumegliant a la Golden Card. Mintga abitanta e mintga abitant da Medel survegn maximalmain 500 francs da la vischnanca per sias activitads. Da custs per abunaments da sport, cultura u commembranzas ad uniuns da sport vegn restituì mintgamai 70%. Medemamain per l'abunament da mesa taxa dals meds dal traffic public. Cun excepziun da l'abunament da mesa taxa vala l'indemnisaziun da la vischnanca sulettamain per activitads che pon vegnir exequidas en vischnanca u en ina vischnanca vischina.
«L'idea dal Pass Medelin è da promover l'attractivitad da la vischnanca. El è ina purschida per tuttas e tuts indigens», di Lara Bergamin ch'è sa participada a la gruppa da lavur che ha preschentà il model a la radunanza communala da mez december. Sco il president communal Claudio Simonet di, ha la purschida nova chattà in bun resun a la radunanza communala: «Cun radund 30 participantas e participants è la radunanza danovamain stada frequentada fitg bain, surtut da la giuventetgna. La proposta integrada cun 60'000 francs en il preventiv è vegnida sustegnida cumplainamain.»
«Ina fitg buna soluziun»
Ch'il Pass Medelin chatta accoglientscha, di era Lara Bergamin: «Nus avain gì blers buns resuns per quella purschida.» Quantas persunas che vegnan a la fin finala a duvrar la purschida vegn pir anc a sa mussar. «La summa da 60'000 francs vegn segir a tanscher per quai ed è era supportabla per la vischnanca. Nus na quintain betg ch'ella vegnia duvrada cumplainamain. Da princip po gea mintga vischina e mintga vischin profitar dal pass», di Claudio Simonet.
Danilo Giger che ha preschentà il model dal Pass Medelin en num da la gruppa da lavur a la radunanza communala di: «Tenor mia opiniun è quai ina fitg buna soluziun. Ella è era pli favuraivla e pli simpla da realisar, che sche la vischnanca avess stuì sa cumprar en insanua sco per exempel en la Golden Card.»
Daners duain star en la regiun
«Ina da las finamiras dal Pass Medelin è ch'ils daners che la vischnanca paja per quai restan en la regiun. Per quest motiv duai la contribuziun da maximalmain 500 francs vegnir impundida per ina purschida en vischnanca u en ina vischnanca vischina. L'unica excepziun è il sustegn finanzial per ils meds dal traffic public», di Lara Bergamin.
Avant che lantschar il Pass Medelin han la suprastanza communala e la gruppa da lavur sclerì las pussaivladads da pudair sa participar a la Golden Card. Sin fundament da cunvegnas existentas da las tschintg vischnancas participadas vi da quella n'è in'integraziun da la vischnanca da Medel en la Golden Card betg stada pussaivla.