Dapi l'emprim da zercladur po la populaziun indigena da las vischnancas da Mustér, Tujetsch, Andermatt, Hospental e Realp retrair ina carta che custa 333 francs e che lubescha betg sulet da far diever da las pendicularas. L'uschenumnada carta dad aur (Golden Card) porscha access a diversas purschidas sportivas e culturalas dad omaduas varts da l'Alpsu.
In mais suenter l’introducziun han 2'000 cartas per persunas creschidas e 500 cartas per uffants chattà ina cumpradra u in cumprader. Il president communal da Tujetsch, Martin Cavegn è cuntent dal resun e discurra dad ina legraivla partenza da l'abunament. Il president communal è da buna speranza da cuntanscher il dumber avisà da 3'100 cumpraders da la carta per persunas creschidas entaifer in onn. «Quest dumber duvrain nus per cuntanscher las finamiras finanzialas dal project da pilot planisà per trais onns», di il president communal. La vendita haja er in'influenza sin las finanzas da las vischnancas, sco Martin Cavegn tradescha.
Sche la carta dad aur chatta dapli ch’ils 3100 cumpraders creschids, sminuescha quai las contribuziuns finanzialas da las vischnancas a l'abunament.
Plaschair dal resun dals segund indigens
Ina analisa detagliada en tge vischnancas che l'abunament da 333 francs ha chattà il pli grond resun, na po il president communal da Tujetsch anc betg porscher. «Jau pens dentant che quai sajan persunas che han fin ussa gia fatg diever dad ina u l’autra purschida.»
Martin Cavegn spera che la part da la populaziun che n'ha fin ussa betg duvrà uschè savens l’infrastructura turistica, culturala ed il traffic public po vesair ils avantatgs da l'abunament e ch’ella saja era pronta da cumprar la carta. Plaschair ha Martin Cavegn betg sulet dal resun positiv da la populaziun indigena. El ha intervegnì da la represchentanza da las possessuras e dals possessurs da segundas abitaziuns ch’els hajan chapientscha e ch’els sustegnian la nova purschida en favur da la populaziun indigena.
Speranza sin visitas indigenas
Possessuras e possessurs da la carta dad aur han era access al Museum La Truaisch a Sedrun. Tarcisi Hendry ch’è responsabel per il museum spera che dapli glieud indigena chatta grazia al nov abunament la via en il museum. «Dapi l’entschatta zercladur n'avain nus anc betg gì avert bler il museum, uschia ch’igl è memia baud da bilantschar.» Tuttina ha Tarcisi Hendry fatg stim dad ina u l’autra nova visita indigena en il Museum La Truaisch.
Access porscha la carta era a la purschida dal Bogn Sedrun ed al Center Fontauna a Mustér cun sia infrastructura da sport. Gion Hosang maina omaduas instituziuns ch’èn dentant manaschis independents.
Nus vesain a las entradas bleras cartas dad aur.
Gion Hosang è da l'opiniun che las persunas che hajan fin uss visità regularmain il Bogn Sedrun u il Center Fontauna hajan era cumprà il nov abunament. «Simplamain perquai che la carta dad aur è ina fitg attractiva e favuraivla purschida.»
Da nova clientella ha Gion Hosang sin il pli fatg stim en il center da fitness a Mustér u en la part da wellness dal Bogn Sedrun. «Per porscher ina detagliada survista da las entradas èsi sa chapescha anc memia baud», di il manader dal Bogn Sedrun e dal Center Fontauna.