En il musical vai per raps ed engurdientscha che fan vegnir sutsura in'entira vischnanca. Cun umor, chant e solos d’opera fan la Compagnia Rossini, ch’è vegnida fundada d'Armin Caduff, e laics viver l’istorgia Plaun Salter. Avant trais onns ha la gruppa preschentà «Frisal – Frisal» ed uss èn els pia enavos cun in nov musical.
Regurdanzas da l’uffanza
L’istorgia da Plaun Salter è ina fictiva ch'è maschadada cun regurdanzas da l’uffanza dad Armin Caduff, ed in lieu crappus a l’ur da Tavanasa. Ina da las rollas principalas è l'eremit, in um vegl e solitari. Tenor la memoria d’Armin Caduff ha quest vivì e ina tauna tut persul. Sco uffant hajan els gì tema da quel. In di han Armin Caduff e ses frar chattà l'eremit mort en il guaud. Pervia da questa memoria impressiunanta è l'eremit ina da las rollas principalas. Giugà vegn el da Flurin Caduff ch’è reschissur dal toc, chantadur professiunal ed il figl dad Armin Caduff.
Famiglia Caduff fitg involvada
Armin Caduff è il dirigent ed autur e Flurin Caduff il reschissur, actur e solist. Els dus han ina collavuraziun stretga en quest musical Plaun Salter. Cunquai che Armin Caduff ha scrit l’entir toc saja stà cler ch'insatgi ch'enconuscha bain el duai surprender la reschia e far viver quest musical.
Flurin Caduff di, che ses bab fa tranteren anc midadas per perfecziunar il toc. El sez chattia alura mintgatant ch'igl fiss uss bun. Armin Caduff manegia numnadamain mintgatant memia bain, di Flurin Caduff cun in rir.
Igl è dentant in’ovra da tut la famiglia Caduff. Sper il bab e figl maina la figlia Maria Catrina Albin-Caduff la producziun. Ella chanta era sco solista e guarda che tuts èn il dretg mument al dretg lieu. La dunna dad Armin Caduff, Lisabet Caduff, gida cun ils costums e davos las culissas dapertut nua ch’ella po.
Istorgia Plaun Salter
En il musical scrit d’Armin Caduff vai per la crappa a Plaun Salter. En sia fantasia è quella plain cristals ed uschia fitg preziusa. Quai fa la runda e sveglia l'interess - tranter auter da trais dunnas: in'indigena ch’è milliunaria, ina Taliana dal Vatican ed ina Lady da Londra. Ma era l'augsegner ed in cusseglier communal sagian la gronda fatschenta. Ils purs na vulan dentant savair nagut da quai e l'eremit, che viva datiers, vul ses ruaus. Tut questas persunas e lur differentas opiniuns chaschunan in chaos en la vischnanca.