Il pievel duai votar davart l’avegnir dal Spital regiunal a Glion. Quai pretenda la partida liberaldemocratica da la Surselva. En ina brev averta scrivan ils commembers dal parlament communal da Glion – ch'ina decisiun da tala impurtanza stoppia vegnir fatga da la populaziun, e betg dals delegads e da las delegadas da la Sanasurselva.
Nus vulain simplamain dir: il pajataglia sa participescha, pia duai el er avair in pled en chapitel.
La PLD disturba il fatg che l'opziun d'in center da sanadad ambulant – preschentà en il studi da PwC – vegnia simplamain sbittà. Quai cun l'argument che questa varianta na saja tenor citat «actualmain betg pussaivla politicamain». Tge che saja pussaivel politicamain decidia ina votaziun dal pievel, concluda la partida.
La PLD pretenda perquai che las variantas d'in ospital sco fin uss e d'in center ambulant vegnian elavuradas e preschentadas a la populaziun per ina votaziun da princip.
Jau dubitesch fitg ch’ils delegads e las delegadas dal la Sanasurselva midan la decisiun ch’ins ha prendì il november da betg persequitar in ambulatori.
En la sesida da delegads da la Sanasurselva dal november avevan ils represchentants da las vischnancas decis da betg persequitar la varianta d’in ambulatori. Cun quella decisiun vuleva la Sanasurselva procurar per ruaus en l'ospital e segirtad tar il persunal, sco René Epp ha ditg sin dumonda da RTR.
Studi aveva scusseglià da mantegnair tut las purschidas
Dapi onns cumbatta il Spital regiunal Surselva cun sfidas finanzialas. Avant passa dus onns ha l'instituziun perquai dumandà las vischnancas per in pachet da salvament finanzial da passa tschintg milliuns francs. Dapi lura datti grondas discussiuns davart la finanziaziun ed er davart la purschida ch'i duai dar en l'ospital a Glion. Il november 2024 ha la radunanza da delegads lura decis da laschar examinar la situaziun da la Spital Regiunal Surselva SA. Ina interpresa externa aveva fatg las suandantas recumandaziuns:
- Mantegnair l'ospital acut cun ina purschida da prestaziuns reducida: Questa varianta prevesa ina purschida pli pitschna e qua tras in regress da la svieuta. Tenor l'analisa muntass quai ina reducziun da persunal da 9%. La partiziun da chirurgia vegniss reorganisada. In ulteriur punct è da stritgar la partiziun da naschientschas, ginecologia e la pediatria. Er operaziuns a partir da la saira da las 18 uras duain vegnir stritgadas.
- Center da sanadad ambulant: Enstagl da l'ospital acut sco fin qua prevesa la segunda varianta in center da sanadad ambulant senza prestaziuns staziunaras. Quai muntass, tenor l'analisa ina reducziun da persunal da 76% (49 plazzas cumplainas). Questa varianta fiss ina midada da paradigma. Ella n'è actualmain dentant betg pussaivla pervia da las prescripziuns politicas.