Rueun - Scurrentà triep da lufs sper il vitg - Novitads

Il guardiaselvaschina ha cun la lescha vertenta el mument sulettamain la pussaivladad da scurrentar lufs che vegnan memia datiers al territori abità cun culps d'avertiment, projectils da gumma ni er narcosas. Ils criteris per ina regulaziun fissan mo avant maun sch'in luf stgarpass ina tscherta quantitad dad animals da niz e surtut sch'el daventass in privel per ils carstgauns. Alura dastgass l'Uffizi da chatscha er far diever da la clausula generala da polizia e sajettar il luf problematic.

Tenor l'ordinaziun federala da chatscha dastga in luf singul vegnir sajettà, suenter ch’el accumplescha ina da las suandantas premissas:

stgarpà entaifer quatter mais 25 animals da niz pitschens
stgarpà entaifer in mais 15 animals da niz pitschens
stgarpà entaifer quatter mais 10 animals da niz pitschens, sch'igl ha pli baud gia dà donns entras lufs
stgarpà entaifer quatter mais 2 animals da niz gronds

Sco animals da niz gronds valan las spezias bovinas, equestras e camelids dal mund nov – tranter auter èn quai vatgas, chavals, asens, camels e lamas. E las reglas valan mo sche mesiras da protecziun supportablas èn gia avant maun.

Lufs d'in triep dastgan vegnir sajettads sche quel:

ha stgarpà entaifer quatter mais 10 animals da niz
è sa reproducì en il medem onn

Maximalmain la mesadad dals chaniels dastgan vegnir sajettads.

Sch'i sa tracta d'in luf ch'appartegn ad in triep è ina lubientscha dal BAFU necessaria per pudair sajettar. Tar in luf singul dastga il chantun dar la lubientscha da sajettar senza consentiment da l'Uffizi federal d'ambient.

Scurrentar lufs n'è tschert betg la schliaziun, ma sche quai è pussaivel, empruvain nus da far quai.

Autur: Arno Puorger Uffizi da chatscha e pestga

audio

Per tadlar: Scurrentà triep da lufs a l'ur dal vitg da Rueun

ord Actualitad dals 22.02.2023. Maletg: Remo Manetsch

laschar ir. Durada: 3 minutas 25 Secundas.

Tar ils luf vesids a Rueun sa tracti pli probablamain dal triep dal Vorab. Tenor Arno Puorger da l'Uffizi da chatscha e pestga ha quest triep chaschunà paucs conflicts en cumparegliaziun cun auters. Ils lufs hajan stgarpà in tschierv en la vischinanza, quai è pli probabel la raschun daco ch'els eran là, quai tenor il uffizi.

Dus dals lufs per la chasa da Daniel Candinas a Rueun.

Tge far sch'ins entaupa in luf u schizunt in triep? Arno Puorger dil Uffizi da chatscha e pestga cusseglia: I saja da far canera. Sch'il luf n'avess betg dad ir davend, alura saja è inditgà per tuttas e tuts da s'allontanar dal luf. Tar ils lufs che n'eran betg lunsch davend da la chasa da Daniel Candinas, han ils culps gidà. Ma be per in curt mument.

Tgi ch'entaupa in luf duai

star airi e restar ruassaivel, pertge sch'il luf remartga in uman, s'allontanescha el normalmain. Sch'il luf na fugia betg, alura èsi bun da sa far attent cun ferma vusch e da sa retrair plaunsieu
betg s'avischinar al luf – era betg per far fotografias
betg suandar in luf
guntgir lieus nua ch'ils lufs han pitschens
betg pavlar lufs
dustar mangiativas e rument p.ex. suenter grillar per ch'il luf na vegnia betg attratg
tegnair sut controlla il chaun ubain avair el vid la corda
annunziar a la guardiaselvaschina lufs cun cumportament problematic, selvaschina stgarpada ubain donns e conflicts

Funtauna: Uffizi da chatscha dal Grischun

L'effect che nus giavischain n'è betg stà qua. Scurrentar na gida betg.

Autur: Daniel Candinas pur ed abitant da Rueun

Tenor Daniel Candinas ed er auters abitants, eran ils lufs enavos suenter in pèr uras e lura puspè la notg suenter. Era lezza giada saja il guardiaselvaschina vegnì, mo lez n'haja betg pli vis ils lufs.