Avant radund in onn han Martin Cavegn, president communal da Tujetsch (Il Center), e ses figl Nils lantschà lur podcast «Generationengespräche» – in discurs tranter in bab e figl da Sedrun, tranter dus generaziuns e cun dus perspectivas, quai era l'idea innocenta. In artitgel da la Suedostschweiz ha dentant, l'entschatta da favrer da quest onn, rapportà sco emprim ch'il cuntegn è per part main innocent che l'idea.
Persunas che fan insatge uschia stuessan tenor mia opiniun vegnir executadas publicamain
En ina passascha, nua che Nils Cavegn raquinta d'in cas da violaziun presumà d'in pèr talian tras trais umens maroccans a Roma, concluda il Tujetschin: talas persunas duain ins expulsar u executar publicamain.
Suenter la critica en la Suedostschweiz han era 20 Minuten e Watson rapportà davart las remarcas dal podcast. En ils artitgels relativescha Nils Cavegn sia decleraziun «emoziunala» e declera ch'el na giavischa a nagin la mort u che la paina da mort vegnia reintroducida. Er il bab relativescha envers las medias e conceda che tals messadis sajan provocants, ma «tranter la glieud discurra ins uschia». In'acziun da plachats che fa attent en il vitg da Sedrun sin la passascha dispitaivla ha dentant mussà che betg tuts èn d'accord.
Envers RTR declera il president communal da Tujetsch, che las medias hajan interpretà bler, ma na dumondian betg suenter sche quellas interpretaziun sajan correctas. Era la rolla d'el e ses figl accentuscha Martin Cavegn:
Ins sto adina star attent, tge di jau e tge di mes figl. Mes figl crititgescha adina che jau relativesch memia bler.
Gist tar la passascha davart l'execuziun na relativescha Martin Cavegn dentant betg, quai è stà il tenor da las criticas. Er en episodas pli novas da «Generationengespräche» na mettia el betg a lieu las passaschas ch'han procurà per lingias grassas. Envers RTR di il podcaster che ses figl «schess quai oz forza betg pli en quella moda».
Ch'jau sustegn las remartgas da mes figl è fauss, quai è vegnì interpretà uschia.
Per l'ina crititgescha Martin Cavegn las medias, ch'interpreschian fauss il podcast. Per l'autra na veglian ils Cavegns, sco duo da podcast, betg pli prender posiziun en chaussa tar RTR u autras medias. Be l'intervista davart la rolla dubla da Martin Cavegn, sco president communal e podcaster, è vegnida acceptada. Sin la dumonda davart resuns di Martin Cavegn, ch'igl haja dà critica negativa, dentant era fitg blera critica positiva. El stettia tar quai ch'el di. Persunas ch'enconuschian el, sappian ch'el dia quai ch'el pensa. Il podcast veglian ils Cavegns cuntinuar, en futur duai il cuntegn dentant esser puspè main politic.
Ina retorica betg nova
Tgi che dat in sguard sin il profil dad Instagram da «Generationengespraeche» e da Nils Cavegn vesa a tge profils ch'els seguan. Sper sportists, pilots da Formla 1 e Martin Candinas sa chattan en questa glista era diversas persunas cha represchentan in'opiniun conservativa fin fitg dretga: Alice Weidel da la partida tudestga AFD, u Donald Trump, Charlie Kirk, Tucker Carlson e Nick Fuentes. Pia per part persunalitads e politichers dals stadis unids che glorifitgeschan Adolf Hitler (Fuentes), che pensan che dunnas tutgan en cuschina (Fuentes) u che politiseschan cun l'idea dad expulsar esters e la tesa che la libertad d'opiniun è periclitada (AFD).
Expulsar esters, ina «islamisaziun da Berlin» ed in'opiuniun da libertà periclitada – tut temas che er il podcast «Generationengespräche» discuta. Sch'ils profils, situads a dretga, han in'influenza sin il cuntegn dal podcast, na sa laschà betg cumprovar. La sumeglientscha è dentant remartgabla.