La fin d'october n'è la radunanza da vischnanca da Tujetsch betg entrada en la deliberaziun da la revisiun totala da la planisaziun locala. Sco il president communal Martin Cavegn ha ditg sin dumonda da la FMR, è previs da far ina segunda procedura da cooperaziun il favrer. Pervia dal dumber da giavischs retardia quai la revisiun, ma tuttina spera el da pudair preschentar ella danovamain al pievel en il decurs dal matg 2026.
Per la radunanza da vischnanca da Tujetsch dals 29 d'october 2025 è la revisiun totala da la planisaziun locala stada tractandada. La finamira da la suprastanza communala era da suttametter ella a la votaziun a l'urna da dumengia passada, ils 30 da november 2025. Uschè lunsch n'èsi dentant betg vegnì. Vischinas e vischins n'èn betg entrads en la deliberaziun da la revisiun, uschia ch'il termin da votaziun è crudà.
Betg spetgà quella decisiun
«Sin fundament da questa conclusiun instradain nus ina segunda procedura da cooperaziun il favrer. La finamira da la suprastanza communala è da preschentar la fatschenta ad ina radunanza da vischnanca la primavaira uschia ch'ella pudess vegnir a l'urna il matg 2026», di il president communal Martin Cavegn e declera: «La decisiun da la radunanza communala la fin d'october n'avain nus betg spetgà en quella furma, schegea che nus avevan indizis ch'i dettia opposiziun.»
En il rom da la segunda procedura da cooperaziun publica vegnan ils documents publitgads ch'èn vegnids preschentads en il messadi a la radunanza communala. «Mintgina e mintgin che giavischa midadas po inoltrar quellas, pia betg mo quels che han opponì a la radunanza da vischnanca. Probablamain vegn bain insatgi che s'accordava cun la revisiun a s'annunziar cun ses giavischs, damai ch'el vesa ch'auters vegnan era a far quai», di Martin Cavegn.
Ch'ins n'haja betg fatg ina segunda procedura da consultaziun suenter l'emprima, haja in motiv spezial per il president communal: «Nus n'avain betg vis la necessitad, damai che nus avevan paucas resalvas e giavischs.» A la radunanza da vischnanca dals 29 d'october 2025 han dus votums procurà che la fatschenta n'è betg vegnida tractada e ch'igl è vegnì pretendì ina segunda procedura da cooperaziun.
Ina cumissiun independenta
Sco gia tar l'emprima procedura da cooperaziun vegn ina cumissiun independenta a giuditgar ils giavischs che vegnan lura averts en il rom da quella segunda procedura da cooperaziun. La cumissiun consista da persunas d'ordaifer. Il messadi per mauns da la radunanza communala, respectivamain da la votaziun a l'urna, duai lura resguardar las midadas uschè lunsch che quellas èn pussaivlas da realisar. «Gist tenor situaziun vegnin nus a formular in nov messadi», di Martin Cavegn.
In'ulteriura preexaminaziun tar il Chantun n'è betg previsa avant la decisiun dal suveran. «Nus avain tranter tschintg e sis hectaras da memia terren en zona da construcziun. Ina reducziun è indispensabla e quella sminuziun è era per la suprastanza communala fitg malempernaivla», punctuescha il president communal. Duessi il suveran dar suatientscha a memia blers giavischs, pudessi lura esser ch'il Chantun n'acceptia betg la revisiun.
«Igl è ina sfida da procurar per ina soluziun che cuntenta uschè bain ils proprietaris da terren sco la regenza grischuna», vegnan la planisadra Esther Casanova ed il president communal citads en il protocol da la radunanza da vischnanca d'october. Vegniss la revisiun refusada dal chantun, stuess la vischnanca da Tujetsch ir sin ils cudeschs danovamain. «Fiss quai il cas, stuess ina buna part da la revisiun da la planisaziun locala vegnir instradada da nov», di Martin Cavegn. La vischnanca da Tujetsch è vi da quella dapi l'onn 2019.