La vischnanca da Tujetsch aveva preschentà il 2014 ses maletg directiv cun finamiras d’integrar las segundindigenas ed ils segundindigens en dumondas da svilup surtut turistic. Alura al cumenzament da l’onn han ins augmentà las taxas per possessuras e possessurs da segundas abitaziuns e quai senza grond infurmar. Quai haja alura dà il stausch da s’annunziar tar la vischnanca, di l’actuala presidenta e fundatura da l’uniun Vreni Müller-Hemmi. Suenter ina debatta en il cussegl communal ha lez decis dad integrar las segundindigenas ed ils segundindigens, ma sulet sche quels s’organiseschian. Quai è alura stà il cas ed uschia era l’uniun IG Tujetsch fundada.
Nagina uniun da protesta
En bleras regiuns dal Grischun ha quai dà in sumegliant moviment. Las possessuras ed ils possessurs da segundas abitaziuns èn s’unids tar uniuns ed han per part processà cunter l’auzament da taxas e quai fin al Tribunal federal a Losanna, di Vreni Müller-Hemmi. Els sajan ids in'autra via ed hajan vulì tschertgar il dialog. Quai saja reussì, uschia ch’els na sajan betg stads in'uniun da protesta. E vitiers vegnia che la vischnanca da Tujetsch tschertgava in timun communal e cun Beat Röschlin saja er in ord lur retschas daventà president communal, quai saja stà in avantatg senz’auter, di Vreni Müller-Hemmi.
Nus avain vulì tschertgar il dialog.
Grond engaschi per la cultura
La IG Tujetsch organisescha communablamain cun il Forum Cultural Tujetsch in program da cultura per tuts. Quai saja propi ina istorgia da success ch’els veglian cuntinuar, di Vreni Müller-Hemmi. Era apprezieschan els che la purschida na vegn betg sulet nizzegiada da persunas cun in connex tuatschin ma era da persunas or da l’entira part sura da la Surselva.
Suprastanza nova
Per ils proxims 10 onns giavischa Vreni Müller-Hemmi che l’uniun ha vinavant success. Uschia vegnian els ad eleger ina suprastanza nova ils 28 da zercladur e surtut ina suprastanza pli giuvna. Quella vegnia alura a manar vinavant ils interess da tuttas possessuras e possessurs da segundas abitaziuns. Surtut impurtant saja d’infurmar transparent tge che marscha e lura era s’engaschar. Quai saja la via al success, di la presidenta che remetta ses uffizi. Suenter la radunanza generala vegn quai a dar en chasa da scola ina pitschna festa. Il motto è «Verbinden/Colligiar».