Armin Spescha – sche tut va tenor plan, vegni bainprest ad esser pussaivel da far yoga u dad organisar ina saira da film en la baselgia catolica a Sevgein – co èsi vegnì tar quai?
Avant var in onn hai jau survegnì la dumonda da surprender il presidi da la cumissiun da la restauraziun da la baselgia da Sevgein. Jau sun lura sesì ensemen cun mes e mias collegas, e nus avain definì ina visiun: nus na vulain betg sanar in edifizi, dar si colur, montar novas fanestras – nus vulessan atgnamain laschar enavos insatge a las generaziuns futuras, per in auter diever da la societad da la baselgia.
I resta il patratg che la Baselgia catolica ha – il patratg da la cuminanza.
Co vesa quest project alura ora concret, tge vegn fatg auter vi dal bajetg?
Cura ch'ins arriva en baselgia, guard'ins anc adina davant l'altar, là passa la part cristiana, là passa la part da la messa. Cura ch'ins sa volva e guarda sin il balcun, là datti la vart pli profana, là installain nus ina paraid, nua ch'ins po forsa laschar ir in film durant ina saira, là duessi forsa era dar in concert che n'è betg pli davantvart mabain entamez. Nus vegnin a montar in palantschieu da lain, nua ch'ins po era giaschair sin terra e far yoga u insatge cun ils uffants. I resta il patratg che la Baselgia catolica ha – il patratg da la cuminanza. Nus vulain simplamain pudair viver da cuminanza en duas modas.
«Per la cuminanza» – quai pertutga pia tuts. Co avais Vus resguardà ils interess da tuts?
Nus avain fatg en noss vitg in lavuratori che dueva esser in tagl tras la societad. Nus avevan ils scolasts, nus avevan il chor maschadà e nus avevan ils giuvenils, che succedan l'in a l'auter e ch'èn ina part da la societad cristiana tar nus. Quella saira avain nus empruvà dad elavurar tge che pudess esser il nov basegn per cuminanza. Quai è stà nunditg bel – jau crai che nus sajan tuts stads surstads tge ch'è tut vegnì ora, ed era tge motivaziun, energia e tge plaschair ch'igl era qua.
Quest project custa 1,7 milliuns francs – co ha la populaziun reagì?
Nus eran surprais. La populaziun aveva atgnamain la fidanza en nus. Nus avain natiralmain era preschentà in bun plan da finanzas, la populaziun ha ditg quasi unanimamain gea a quest credit. Igl è aut, cunzunt sch'ins pensa che nus faschain quai ussa entaifer in, dus onns – paucas firmas han probablamain expensas dad 1,7 milliuns en uschè in curt temp. Jau crai ch'i dovra blera confidenza da la populaziun, ma questa confidenza avain nus sentì.
Ma – dovri propi quest project?
Sch'ins pensa vinavant dovri quai, gea. Quest plaz che nus faschain è in plaz da la cuminanza. Ina part da quai che nus faschain pudess ins forsa era far en ina garascha u en ina halla, ma quest plaz è uschè bel – ina baselgia è uschè bella. Perquai crai jau gea, i dovra quai che nus purschain pussaivladads per questa cuminanza profana, nua che autras persunas pon s'inscuntrar. L'investiziun dad 1,7 milliuns ha in grond niz, e quai chat jau fitg positiv.