Campiunadi svizzer - Mustér è durant in'emna il center da schah

Ils campiunadis da schah svizzers vegnan organisads gia per la 125avla giada. Per regla han quels lieu en ina destinaziun turistica alpina nua che l’infrastructura da hotels ed ina gronda halla per giugar èn avant maun. L’onn passà è quai stà a Flem, quest onn è Mustér lieu ospitant. La gronda satisfacziun saja che quest onn sa participeschian 285 atletas ed atlets, 20 dapli ch’anc l’onn passà, la finamira saja 300, di il responsabel dal comité d’organisaziun Peter Erismann. Dapli persunas muntassan in sforz organisatoric, pertge la halla duai porscher la pussaivladad che tuts pon giugar il medem mument e talas hallas grondas na datti betg bleras. A Mustér vegn giugà en la halla da tennis dal Center Fontauna ed ina gronda part da las atletas ed ils atlets pernottescha en il Resort Catrina, circa 5 minutas a pe dal Center Fontauna, quai sajan cundiziuns idealas, di Peter Erismann.

Era per Sedrun-Mustér ina gronda plivalur

Talas occurrenzas cun ina tscherta splendur naziunala e che genereschan pernottaziuns saja exact quai che Sedrun-Mustér Turissem giavischia, di il president dal cussegl d’administraziun Silvio Schmid. Era sch’el chapeschia nagut da quai sport saja stà fascinant da sentir l’atmosfera e vesair las preparaziuns ed el veglia vegnir a guardar co las atletas ed ils atlets giogan las partidas.

In sport per mintg’in – u tuttina betg

Il sport da schah sin nivel aut è in sport pretensius e las atletas ed ils atlets vivan era dal dar schah e surtut per il dar schah, di Peter Erismann, ch’è era responsabel per il sport d’elita da schah en Svizra. Il sport sez saja era sa midà ils ultims tschintg onns, pertge durant il temp da corona hajan blers cumenzà a giugar via computer e quels giuvens domineschian uss la scena. E perquai possian ins dir ch’il sport saja vegni pli giuven ils ultims onns ed era pli professiunal. Dal chantun grischuna datti il mument paucas atletas. Sulet tar il turnier dals seniors è cun Slobodan Adzic in atlet posiziunà sin plazza 10 dal classament.

Vegnir a mirar è giavischà

Las partidas cumenzan ils 12 da fanadur e duran fin ils 20 da fanadur. Giugà vegn en differentas categorias. Dals profis fin ad in turnier d’entschaviders nua che mintgina e mintgin po giugar, di Peter Erismann. Las partidas cumenzan mintgamai tuttas il medem mument e quai il suentermezdi a las 13:30 uras. Uschia èsi pussaivel d’observar laics e l'elita svizra tuts il medem mument. Clera ch’ina tscherta savida da schah saja in avantatg da pudair persequitar meglier ils gieus, ma era cura che quai va liber alura vegni tut ruassaivel e gia quella atmosfera da tensiun saja adina puspè fascinant d’observar, era per persunas senza savida sal gieu, declera il responsabel da l’organisaziun.