Städtlilauf Glion - En t-shirts alvs per quellas e quels che na pon betg currer

Ils t-shirts alvs èn crudads en egl – els fan attent a persunas ch'èn pertutgadas d'ina malsogna sco long-Covid u il sindrom da fatigue ch'impedescha da manar in mintgadi usità, nundir da far part ad ina concurrenza da currer.

L'ergoterapeuta Ramona Cathomas ha organisà l'acziun da solidaritad che pensa a tut quellas e quels en Surselva ch'han da cumbatter cun talas malsognas. En ses mintgadi da lavur vesa ella divers destins, cun far spassegiadas en la natira pensia ella savens a pazientas e pazients. Uschia saja naschida l'idea da currer al Städtlilauf per tut quellas e quels che na pon betg.

La finamira da Ramona Cathomas saja stada da vegnir ensemen cun 50 persunas che curran per l'intent, la finala sajan sa rimnadas pli che 80 persunas. Grond e pitschen èn stads da vesair a Glion en il t-shirt alv, cun in ballun alv ubain in tattoo «communblamain vesibels».

A bleras persunas ch'èn pertutgadas d'ina malsogna sco long-Covid n'èsi betg pussaivel da far part ad ina occurrenza sco il Städtlilauf, era betg a l'ur da la cursa. Ellas han memia pauca forza.

Uschè bleras e blers sco anc mai èn currids a Glion

Stgars 700 curridras e curriders han lià a Glion ils chalzers ed èn currids las divesras distanzas da concurrenza tras ed enturn Glion. Uschè bleras participantas e participants n'han ils organisaturs anc mai registrà, quai ha il comité d'organisaziun ditg sin dumonda da RTR. Sper las cursas sur las distanzas da 6,6 e 13,2 kilometers hai er dà cursas per uffants e da nordic walking.