Dapi insaquantas emnas pon ins dar troccas online via la pagina troccas.com. Stgaffì questa pussaivladad han Youngjung Cho e Silvana Wieland che studegian a la Scola politecnica federala a Turitg. Per la studenta sursilvana èn las troccas ina impurtanta part da la cultura sursilvana.
La pagina troccas.com è ina pagina che porscha la pussaivladad da dar troccas via meisa digitala. La pagina porscha era tschertas infurmaziuns davart il gieu e sia derivanza. Ella fa attent a las atgnadads dal gieu cun diversas reglas che sa differenzieschan dad in vitg u dad ina regiun a l'autra. Las indicaziuns sin la pagina tradeschan enconuschientschas detagliadas da l'origin da las troccas e co i vegn giugà. La pagina inditgescha ina adressa da contact ch'è via mail pronta da prender encunter resuns sin il gieu. Ma tgi ha dentant lantschà questa pagina da giugar online?
Nunenconuschent
Ils exponents da l'Uniun grischuna da troccas ch'organiseschan mintgamai il campiunadi grischun da troccas na san nagut dad ina purschida da giugar online. Tant Annalisa Cathomen sco Andreas Muoth mussan dentant interess vers la nova pussaivladad da giugar. Martin Cantieni che s'engascha cun ses frar Gion Andri Cantieni regularmain per servetschs digitals rumantschs na sa medemamain nagut da la pagina da troccas. «Nus avain gia discutà da stgaffir sez ina tala purschida», di Martin Cantieni. Tgi che ha dentant fatg l'emprim pass cun il gieu da troccas en la rait na sa el betg. «I dat sa chapescha bleras Rumantschas e blers Rumantschs ch'èn abels da far quai.»
In project privat
Entant è ina resposta vegnida via mail sin la dumonda suenter l'origin da la preschientscha da questa part da la cultura rumantscha en la rait. Ina resposta per englais suttascritta da Youngjung Cho. El scriva dad avair emprendì d'enconuscher las troccas tras sia amia e la famiglia da l'amia «Atgnamain hai jau programmà questa pagina sco project privat per pussibilitar a la famiglia ed a mia amia da giugar troccas senza esser direct a maisa.»
Youngjung Cho fa attent che la pagina na saja anc betg finida e perquai na saja el era betg segir, sche la purschida possia satisfar per il mument. E l'amia da Youngjung Cho sa numna Silvana Wieland ed è creschida si a Cumpadials. Ella studegia scienza da material a la Scola politecnica federala e Youngjung Cho che deriva da la Corea dal Sid studegia en la medema scola auta electronica e tecnologia da communicaziun. Quai è sa chapescha ina basa ideala per stgaffir in gieu da troccas online.
Impurtanta part da la cultura
Silvana Wieland ha emprendì da giugar troccas en ses da chasa a Cumpadials. Per ella è quest gieu ina impurtanta part da la cultura rumantscha sursilvana. «Mes ami ha vulì stgaffir insatge per la regiun e jau hai fatg la proposta da crear in gieu da troccas online.» Silvana Wieland punctuescha ch'il gieu na saja anc betg finì. «Igl è per il mument anc betg pussaivel da vesair las cartas e per discurrer stuess ins anc integrar ils meds da communitgar directs.» Per la giuvna studenta e ses ami èsi sa chapescha era ina dumonda da las finanzas, quant lunsch ch'els vulan sviluppar e mantegnair la pagina. «Segirà e registrà il num da la pagina ha gia custà e duvrar il servetsch dad in server custa cuntinuadamain.» Silvana Wieland è conscienta ch'i fiss insatge necessari da tschertgar sponsurs per la pagina da giugar troccas. E Youngjung Cho n'è betg sulet abel da programmar ina pagina da giugar troccas, el sa era giugar sez. En sia patria da la Corea dal Sid datti probablamain paucas persunas che san giugar troccas. Forsa è il giuven student da la Scola politecnica federala era il sulet. Quai po dentant midar, sche las troccas chattan dapli adherents en la rait.
Dapli sin troccas.com