La gronda sfida per l’uniun Trun Cultura è da chattar ils daners necessaris e quai stettia uss en il center da las stentas, uschia Armin Niederberger il nov president da l’uniun. Senza na possian els betg realisar lur finamiras. Ed in dals puncts centrals resta da far pli populara l’uniun, quai era a Trun. Perquai che senza Trun na saja il project betg realisabel, ils artists sajan da Trun ed uss stoppia vegnir promovida l’idea entaifer la populaziun. Per Armin Niederberger saja Trun ina segunda patria, sia partenaria è ina biadia dad Alois Carigiet e perquai haja el ina stretga relaziun cun la Surselva e cun l’art dals Carigiets.
Infurmar la populaziun
Il mument èsi anc memia baud d’infurmar la populaziun davart svilups, ma quai vegnian els a far, forsa gia l’atun. L’emprim èsi stà da posiziunar intern da nov e perquai hajan els engaschà ina mainfatschenta. Cun Gisela Göttmann hajan els chattà ina dunna engaschada gia dapi blers onns en il Grischun e per la cultura, di Niederberger. Gisela Göttmann è tranter auter stada engaschada passa 10 onns per il project Nairs en l’Engiadina Bassa ed ha enconuschientscha da promover art en il Grischun.
Spazi Spescha sin il 2023
Il pli simpel project da propi realisar saja probabel il spazi Spescha en l’anteriura fabrica da ponn a Trun. Qua veglian ins uss francar il contract d’affittaziun ils proxims mais ed uschia vegnir in pass vinavant. Parallel vegnian els a rimnar daners ed uschè spert sco pussaivel cumenzar cun las lavurs vida la chasa Carigiet. Ma il mument na saja il temp betg ideal per bajegiar, cunquai che las materialias èn uschè charas, tuttina vegnian els immediat a cumenzar cun las lavurs cura che avunda daners èn en cassa. Plinavant vegnian els a contactar il cont Luca Padulli per dapli sustegn finanzial, ma els sajan gia fitg cuntents che lez haja cumprà las duas chasas Carigiet e Desax e laschà a tschains quellas a l’uniun per 99 onns cun in'opziun per ulteriurs 99 onns. Els vegnian anc a dumandar autras instituziuns e potenzials – uschia èn els optimistics che sin il giubileum da 600 onns Ligia Grischa vesian ins in svilup era tar la chasa Carigiet.
