La lubientscha per spazzar la «Casa Carigiet» è il mument anc pendenta tar la vischnanca da Trun. Ils responsabels na quintan betg cun recurs u protestas, pertge ch’il palancà ed il tetg provisoric vegnan davent saja en l'interess da tuts, uschia il president da l’uniun Armin Niederberger. Cura che questa lubientscha è sin maisa vegnian els definitivamain a surdar las lavurs e cumenzar cun rumir ils donns dal brischament. Per questa emprima etappa è budgetada ina summa da 400’000 francs. Quests daners na sajan anc betg sin il conto da l’uniun, ma avunda daners per cumenzar, uschia Niederberger.
Cura che las lavurs cumenzan èsi pli simpel da rimnar daners
La situaziun finanziala saja il mument anc adina problematica, ma cura che las lavurs cumenzian vegnia quai pli simpel da rimnar daners, uschia Armin Niederberger. Perquai ha l’uniun era midà il mainafatschenta e responsabel da project e chattà cun Peter Fischer in um cun blera experientscha. Fischer ha tranter auter manà il museum Paul Klee a Berna. In da quests pensums che Fischer vul surpigliar il proxim temp è da vegnir a daners dal chantun. Lez haja dentant la strategia da sustegnair projects e betg renovaziuns d’edifizis, uschia Fischer.
Spazi Spescha è il pli lunsch
In'auter project sut la batgetta da Trun Cultura è il Spazi Spescha. Cun l’exposiziun planisada ils 17 da zercladur è l’emprim pass concret da l’uniun en vista. Qua sajan ins sin fitg buna via, uschia è il transport gia organisà ed era ils daners per l’exposiziun èn segirads, uschia Peter Fischer. Cun quest pass vegnian els a pudair mussar ch’els vegnian era da realisar concret in project ed uschia a stgaffir fidanza per donaturs potenzials.
