Uss è ella averta l'exposiziun «Nus dunnas – nus fagein e basta!» per festivar il giubileum da 50 onns da l'Uniun da dunnas Sevgein. Per lantschar l'exposiziun han las dunnas fatg insatge extraordinari: ina chadaina da crutsch che tanscha da Sevgein fin a Glion, cun ina lunghezza da 2,7 km.
Iris Cadalbert da l'Uniun da dunnas declera che l'idea cun il chanè è naschida or dal fatg che l'uniun è vegnida fundada avant 50 onns precis or quest motiv: per far crutsch ensemen.
Las dunnas da Sevgein vulevan far in curs da far crutsch tar l'Uniun da dunnas da Glion. Lezzas avevan dentant betg avunda plaz. Quellas d'ordvart han lura betg pudì participar. E perquai han las dunnas da Sevgein fundà sez in'uniun.
Tut las 30 commembras da l'uniun han participà a quest project dal chanè gigantic. Flavia Walder, ch'ha surprendì la lavur da rudlar si il chanè, raquinta che las dunnas èn stadas fitg lavurusas cun far crutsch.
L'exposiziun ha l'intent e da far visibel la rolla da las dunnas en las vischnancas muntagnardas e mussa differents aspects da la lavur da las dunnas en la societad. E sper il fil da colliaziun blau alv che vegn puspè rullà si en in chanè gigantic, èsi da vesair en differentas stanzas, exponats che mussan la contribuziun da las dunnas per la societad.
Surtut ils uffants han gì plaschair vi da l'acziun
-
Bild 1 von 4. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
I dat per exempel ina stanza che mussa che l'uniun da dunnas ha fundà la scoletta, ed in'autra che tematisescha pregiudizis davart las uniuns da dunnas ed anc bler dapli.
L'exposiziun è da vesair en il Museum regiunal Surselva a Glion enfin la fin da mars 2026.