Siglir tar il cuntegn

Header

cuntegn

Via en Val Medel Via avra sin in vial

A partir dad oz a mezdi vegn la via da Medel puspè averta. Quai almain sin in vial. Cura ch'ella po puspè vegnir averta dal tut n'ha l'uffizi da construcziun bassa anc betg decidì.

Actualmain è ella anc serrada fin las 12:00.

Via serrada suenter crudada da crappa

Suenter la crudada da crappa dal glindesdi, ils 5 d'october sin la via principala tranter Mustér e Curaglia è la via stada serrada durant divers dis. Las lavurs èn bain avanzadas, perquai po la via ussa puspè vegnir averta almain sin in vial.

Regenza duai s'exprimer

La via tranter Mustér e Curaglia duai era vegnir tematisada en la sessiun dal Cussegl grond l'emna proxima. Sco quai che la FMR rapporta ha il deputà Clemens Berther deponì dumondas a la regenza co ella vesia l'avegnir da la segirtad da la via chantunala atras Las Ruinas.

Grip en moviment

Sco las mesiraziuns da l'Uffizi chantunal da construcziun bassa avevan mussà il mardi suenter, eran ulteriurs 1'000 meters cubic material en moviment. Quels han ins stuì rumir per segirar la via.

1'500 meters cubics èn vegnids a val

La crudada da crappa è capitada il glindesdi suentermezdi. Lura eran 1'500 meters cubics crappa sa distatgads da la costa curt avant il tunnel che maina direcziun Mompé Medel. 100 meters cubic èn vegnids fin en la via principala ed han bloccà quella.

Transport d'auto da posta tranter Mustér e Curaglia

La vischnanca da Medel ha organisà in transport cun auto da posta tranter Mustér e Curaglia. In bus va da Mustér enfin Fontanivas – silsuenter èsi dad ir a pe radund 15 minutas da la via veglia enfin si Mompè Medel. Là datti puspè il transport enfin a Curaglia. Quai ha il president communal da Medel Rico Tuor annunzià ad RTR – dentant cun accentuar che quai saja ina schliaziun be per persunas che sajan bain en pe.

Ils bus partan tenor urari en omaduas direcziuns. Questa colliaziun veglian els porscher enfin che la via saja puspè averta, uschia Tuor.

video
Medel: In viadi da scola tut special pervi da la crudada da crappa
Or da Telesguard dals 08.10.2020.
laschar ir

Uffants pon puspè ir a scola e stizun dal vitg vegn furnida dal sid

Da fertant ch'ils scolars e las scolaras da la Val Medel han fatg il mardi instrucziun a distanza, han els suenter puspè pudì ir a scola a Mustér, uschia ha declerà Rico Tuor, il president communal da Medel. Els prendan il bus e vegnan accumpagnads sin il tschancun a pe. Las furniziuns per la stizun dal vitg a Curaglia sajan er segiradas, cunquai che la vart dal sid dal Lucmagn è averta.

RTR novitads 17:00

Artitgels legids il pli savens

Scrollar a sanestra Scrollar a dretga