Dapi decennis vul la vischnanca da Mustér sviluppar il center dal vitg. Quai per exempel cun crear parcadis, pussaivladads per inscunters, per la recreaziun ubain era per meglierar la situaziun per il commerci. Quai scriva la suprastanza en il messadi deliberà per mauns dal cussegl da vischnanca, il parlament. Sin basa da tals giavischs aveva la suprastanza gia elavurà in concept cun 10 mesiras per sviluppar il center dal vitg ed il conturn.
Parcella 736 permez il vitg duai gidar a revitalisar il center
En il rom da questas mesiras vesa la suprastanza era sia proposta actuala da cumprar la parcella 736 permez il vitg da Mustér cumprais ils bajetgs. Tenor la suprastanza gidass quest areal – ensemen cun auters – a realisar mesiras dal concept per revitalisar il center dal vitg. Concret fiss previs da crear in punct d'inscunter per la populaziun ed ils giasts, augmentar l'attractivitad dal commerzi indigen, crear parcadis – però era da meglierar la situaziun tranter peduns e traffic motorisà. E dapi decennis vul la vischnanca era cumprar questa parcella – però pir las tractativas dals ultims 3 onns cun ils ertavels da l'areal han purtà fritg.
La populaziun duai participar cun inoltrar ideas
La populaziun duai participar ed era pudair inoltrar propostas ed ideas per projects concrets. Perquai n'ha la suprastanza betg anc definì projects concrets. Sin basa da las ideas or da la populaziun vul ins pli tard elavurar las finamiras e fixar las cundiziuns per ina concurrenza d'investurs publica. La finamira è da metter a disposiziun il terren ad investurs cun projects adattads en dretg da bajegiar.
Suenter tractativas da 3 onns è l'offerta da 3 milliuns sin maisa
La proposta sin maisa che sa basa sin stimaziuns independents e las tractativas munta a 3 milliuns francs. Quai per la parcella permez il vitg, però era ils ulteriurs terrens da la cuminanza d'ertavels Couchepin-Hess. Quai era ina cundiziun da la cuminanza d'ertavels da chattar ina schliaziun cumplessiva da l'entir terren. Perquai cumpiglia l'offerta da 3 milliuns francs tut las parcellas. Ed era sche las stimaziuns quintan cun ina valita da stgars 2,6 milliuns francs propona la vischnanca ils 3 milliuns en vista a la muntada era economica dals svilups spetgads.
Per la transacziun definitiva dovri però anc il consentiment dal suveran a l'urna – votà vegn ils 30 da november.