Siglir tar il cuntegn

Header

cuntegn

Tavau WEF e vischnanca collavuran a lunga vista

Il Forum mundial d'economia, WEF e la vischnanca da Tavau vulan collavurar a lunga vista – vul dir il partenadi da blers onns duai vegnir rinforzà e sviluppà vinavant. Ins haja suttascrit avant in per dis ina decleranza, hai num en ina communicaziun da la vischnanca. Il WEF vul intensivar la collavuraziun cun la vischnanca, la communicaziun cun la populaziun e surpigliar dapli custs d'infrastructura e segirtad. Vul dir la vischnanca da Tavau ed er il chantun Grischun duajan vegnir distgargiads finanzialmain.

Il Forum mundial d'economia e la vischnanca da Tavau suttastritgan cun la decleraziun la buna collavuraziun dals ultims onns. Il partenadi da blers onns duai vegnir rinforzà e sviluppà vinavant. La cooperaziun strategica va sur la realisaziun da singuls inscunters annuals ora. Uschia duai vegnir garantì ch'ils inscunters annuals dal WEF sajan per las participantas ed ils participants uschè attractivs sco pussaivel. A medem temp duajan els er avair lieu uschè miaivel e duraivel sco pussaivel per la populaziun locala sco era per l'ambient. Las maisas radundas realisadas cun la populaziun locala, cun spezialistas e cun spezialists sco era cun collavuraturas e collavuraturs hajan gia furnì inputs impurtants en quest connex.

Ils dus partenaris han definì champs d'acziun strategics per sviluppar vinavant ils inscunters annuals. Uschia vulan omadus s'engaschar vinavant per ch'i stettia a disposiziun alloschis per participantas e participants, per collavuraturas e collavuraturs e per persunas da segirezza. Plinavant duain vegnir optimadas tant las lavurs d'installaziun e d'explotaziun sco er il traffic. L'infrastructura resta sin in aut nivel e vegn adattada e meglierada là, nua che quai è necessari.

I saja l'intenziun che las emissiuns da CO2 al lieu restian uschè bassas sco pussaivel e las materialias vegnian duvradas pli e pli en curs circulars. Per quai sustegnan la vischnanca da Tavau ed il Forum mundial d'economia differents projects existents. Ultra da quai sa participescha il WEF cun 1 milliun francs per construir ina nova centrala termica tar il center da congress, uschia ch'il stgaudament fossil po vegnir substituì.

Or da l'archiv:

video
Tge è il WEF?
Or da Minisguard dals 20.01.2024.
laschar ir. Durada: 3 minutas 3 Secundas.

RTR novitads 11:00

Artitgels legids il pli savens