Teater - «Die Gemeindeversammlung» – premiera a Cuira

Cura ch’il mund brischa – ed ins sa dispita davart minigolf

Quai che tuna sin il palc sco ina cumedia, ha ragischs realas. «Die Gemeindeversammlung» sa basa sin protocols da radunanzas grischunas. L’autur Lukas Linder ha sa laschà inspirar dal cudesch «Das Gelbe des Eis» da Donat Caduff. 

Caduff aveva evaluà avant quatter onns durant mais protocols da var 40 vischnancas grischunas ed ha mussà quant datiers che la democrazia directa e la satira reala èn.

«Die Gemeindeversammlung»

A la radunanza communala en la vschinanca fictiva Oberglüeli èsi enconuschent ch'ella sposta las decisiuns impurtantas. I manca il preventiv, ed avant ch’i va per salvar il vitg vegn dispità davart plazzas da minigolf, uras da recicladi e pasts a radunanzas communalas.

Impressiuns dal teater

«In stgazi che pudess ir a perder»

Il reschissur Manfred Ferrari inscenescha il toc da teater da Cuira ed empermetta in mix da differents genres.

Per el saja stà impurtant d’avair in cler messadi: «nus stuain guardar sin nossa democrazia directa. Ella è in stgazi – ed ella pudess ir a perder». Il toc mussa quant svelt che discussiuns cupitgan. Dumondas materialas daventan persunalas, dumondas da pussanza stgatschan cuntegns. Mintga individi ha agens interess. La halla da gimnastica daventa in’arena politica.

Figuras ch’ins enconuscha

Ils caracters èn surpostads – e tuttina famigliars. In commember da la suprastanza vul adattar las uras d’avertura dal post da recicladi pervia da las temperaturas creschentas. In auter propona insatgi auter da simplamain metter si donaturs cun crema da sulegl. In ustier cumbatta per transfurmar la plazza da minigolf avant sia ustaria en in curtin da biera – e sa senta bloccà sistematicamain. Cuntanscher tut ils interssens in vi da l’auter na saja betg simpel.

Cun Jonathan Ferrari, David Flepp e Lorenzo Polin èn trais acturs rumantschs sin il palc. Ils trais acturs van perina: Las figuras giugadas èn enconuschentas, forsa betg exact uschia – ma ins enconuscha forsa insatgi en l'agen vitg che reagiss sumegliant.

Era Lorenzo Polin vesa parallelas cun la realitad. En il toc vai per temas che muventan e polariseschan la populaziun. «Talas votaziuns pon colliar la glieud», di el e renviescha a discussiuns actualas en Engiadina ch’èn medemamain vegnidas manadas a moda emoziunala en il rom da la debatta davart l’ospital da l’Engiadin’Ota.

La planisaziun dal toc ha cumenzà avant passa dus onns. Lukas Linder ha scrit pliras tschiffadas, las emnas passadas èn vegnidas experimentadas intensivamain.

In spievel da la societad

Cun la represchentaziun sa transfurma la sala da gimnastica dad Oberflüeli en ina tribuna – ed il palc en in spievel da la societad. «La radunanza communala» mussa, quant fragila che la democrazia directa po esser. Ella viva mo, sch’ils participads la prendan serius – ed èn pronts da purtar responsabladad. La premiera è mesemna en il teater da Cuira. Ulteriuras represchentaziuns suondan venderdi e sonda.