La Gruppa da teater Scuol preschenta durant las ultimas duas fins d'emnas da november ina cumedia dramatica cun il titel «Sü Ü». Il toc han sviluppà las acturas ed ils acturs sezs ensemen cun la reschissura professiunala Annina Sedlacek.
Far ina gita e lura pernottar en chamona – quai ha la tempra d'aventura, da romantica u l'empermischun da quietezza dalunsch davent da la civilisaziun. Ma tge capita, sche differentas persunas che na s'enconuschan betg èn tuttenina serradas en ina chamona, senza savair cura e sch'ellas dumognan insumma puspè da la bandunar? Precis en questa situaziun sa chattan las protagonistas ed ils protagonists dal toc da teater «Sü Ü».
Ina grond'ovra d'art
Per la represchentaziun da quest onn ha bandunà la Gruppa da teater Scuol sia zona da confort. Empè d'emprender text per ina rolla d'in toc da teater existent, ha quai signifitgà: Nus sviluppain sezs in teater. Sustegn han survegnì las acturas ed ils acturs laics dad Annina Sedlacek. La Sentinra ha absolvì la scola da teater Academia Dimitri a Verscio en il Tessin e lavura sco reschissura ed actura professiunala. Ella ha experientscha cun crear agens teaters.
Durant mia scolaziun avain nus adina sviluppà sezs noss tocs.
Da elavurar in toc da teater nov ha avantatgs. Uschia sa chatta per mintgina e mintgin ina rolla adattada. «Ins po viver ora insatge che n'è betg dà avant, uschia datti er dapli spazi per spontanitad ed improvisaziun, quai ch'è pli datiers a la vita da mintgadi», declera la reschissura. Che questa furma da teater dettia plinavant la pussaivladad a las acturas ed als acturs da giugar ina giada ina figura ch'ins tscherna sez. «Ina creaziun collectiva signifitga er che la creativitad da mintgina e mintgin vegn promovida e cun quai datti ina grond'ovra d'art», di la reschissura.
Co supportar cuminanza?
Da crear in toc da teater sez è er ina sfida. La sfida per la reschissura è da proponer bunas tematicas per improvisaziuns. La sfida per las acturas ed ils acturs è da sa laschar en sin insatge nunenconuschent e da sa fidar che quai reusseschia. A l'entschatta è qua mo in'idea ed enturn quella naschan figuras, scenas e la finala in'istorgia cun ina dramaturgia e forsa er cun in messadi. Anna Mathis è suprastanta da la Gruppa da teater Scuol.
Igl è ina sfida da construir si in toc en pass, da na savair a l'entschatta tge che ans spetga.
Ch'i n'haja betg dà questa giada in script per sa tegnair londervi e ch'il fil cotschen saja questa giada lartg. Ma las emprovas èn tenor l'actura adina fitg divertentas e tuts emprendan ina massa. «Nus sco gruppa badain ch'i va er auter e che nus tuts essan buns da sa laschar en sin quest experiment flot», manegia ella.
Bler spazi per situaziuns comicas
En il toc «Sü Ü» vai insumma per la dumonda: Co supporta ins ina cuminanza, sch'ins na l'ha betg tschernì e na po betg la bandunar? Tgi va enturn en tge maniera cun ina situaziun da crisa? Ma i va er per il tema brisant da las catastrofas da natira en las muntognas. Quai che tuna grev ha bler potenzial per situaziuns comicas. La levezza creeschan las acturas ed ils acturs cun giugar cun limits, cun exageraziuns, clischés ed er cun chant. Las figuras van per part en in extrem che para ridicul e precis quest extrem mussa las flaivlezzas e fermezzas umanas.