Malgrà corona: Er quest onn hajan las autoritads quintà cun varsaquants e varsaquantas che van vers sid. Tenor il pledader da medias da la Polizia chantunala grischuna, Roman Rüegg, sajan er blers ids en viadi. Surtut la gievgia saira sajan blers autos stads sin via. Disturbis da traffic n'hai dentant betg dà.
La situaziun actuala
Tenor Roman Rüegg stoppian ins surtut quintar il glindesdi da Pasca cun colonnas sin via. Dad ina vart turnan ils osps dal Tessin a chasa. Da l'autra vart va la glieud ch'era en Grischun en vacanzas enavos giu la bassa.
Gottard: bunamain naginas colonnas
Las colonnas al tunnel dal Gottard èn bunamain schon ina tradiziun. Sin il traject dal Gottard passa il traffic normal – en tut las duas direcziuns. Mo sur mezdi hai dà ina colonna da var in kilometer.
La gievgia saira, curt suenter las 14:30 hai dà ina colonna davant il portal dal nord dal tunnel dal Gottard. La colonna saja fin saira stada var trais kilometers lunga.
Sin suandants tschancuns vegn quintà cun bler traffic:
- Spiez – Kandersteg
- Gampel – Goppenstein
- Brunnen – Flüela
- Raron – Brig
- Bellinzona – Locarno
- vias principalas en direcziun dals territoris da skis en la Part Sura Bernaisa, il Tessin, il Vallais ed il Grischun
Era da quintar cun temp da spetga èsi tar las staziuns per transportar l'auto cun il tren. Quai pertutga il tunnel dal Vereina, sco er al Furca ed al Lötschberg.