Tschiertschen e Praden han ensemen var 300 abitantas ed abitants. Quels tutgan dapi bun 8 mais politicamain tar la citad da Cuira. Curt avant la fusiun è a Praden perquai vegnida fundada l'uniun Praden Viv. Fundatur è Martin Jenny e cun agid da sia uniun po el uss s'engaschar per quels da Praden tar la citad da Cuira. Sper Praden ha er Tschiertschen in'uniun da vischnanca cun la medema intenziun, en la suprastanza è là Heidi Engi. Els dus èn adina puspè en contact cun il parlament da Cuira, ed èn cuntents cun la collavuraziun, era sche nagin da Praden e nagin da Tschiertschen n'è en il parlament da Cuira.
Els taidlan tiers a nus. Uschia ch'igl n'è betg relevant che in represchentant da Praden è en il parlament da Cuira.
Martin Jenny haja gia pudì discussiunar davart plirs differents projects cun l'administraziun da Cuira. Tenor el sajan quellas discussiuns fitg constructivas ed orientadas a soluziuns. Ed er Heidi Engi di ch'ins sa senta vesì ed udì e ch'ils basegns vegnan prendids serius. Quels sa differenzieschan numnadamain per part da Cuira, per exempel la dependenza dal turissem ch'è bler pli gronda a Tschiertschen che a Cuira.
Prender decisiuns va pli ditg
In dischavantatg hai tuttina: Tras la collavuraziun dovrian ins dapli temp per prender decisiuns. Quai è ina consequenza ch'era però conscienta a quels da Tschiertschen-Praden.
Pli baud gievan ins tar la chanzlia communala e la decisiun vegniva anc en la medema emna.
Ma grazia a las duas uniuns dals vitgs funcziunia la collavuratuziun bain. E tar las proximas elecziuns a Cuira, po lura era la populaziun da la fracziun Tschiertschen-Praden candidar per il parlament e la suprastanza.