Var in onn e mez suenter l'emprima badigliada per il nov center da scola da la FHGR a la Pulvermühlestrasse a Cuira datti ina invista en il grond plazzal.
Il project grond da total 178 milliuns francs è vegnì acceptà cleramain dal suveran grischun l'onn 2023. Quai è stà in ferm segn per il rinforzament dal chantun Grischun sco lieu da furmaziun ed in success per il Departament d'infrastructura, energia e mobilitad.
Squitsch da temp, ma tuttina bilantscha positiva
Il nov edifizi da la Scola auta spezialisada è in dals pli gronds projects da construcziun auta dal chantun. In project talmain grond pretendia blera communicaziun e planisaziun, ma il project saja sin buna via, quai communitgescha il Departament d'infrastructura, energia e mobilitad.
Cun il nov edifizi persistent vegnan l'instrucziun e la perscrutaziun unidas en l'avegnir en in nov campus per las studentas ed ils students sco er per las collavuraturas ed ils collavuraturs.
Enfin ussa n'hai betg dà grondas difficultads – ins è propi avanzà bain, era l'aura ha fatg cun. Nus essan propi arrivads precis là, nua che nus avevan planisà.
Actualmain è la scola auta spezialisada repartida sin tschintg lieus en nov edifizis entaifer la citad da Cuira.
Laina grischuna
La laina per la structura purtanta dal palantschieu sura deriva da guauds grischuns. Ella è vegnida pinada l'enviern 2024 e lura tagliada e setgentada en differentas resgias dal chantun. Silsuenter han las interpresas da construcziun cun lain elavurà las travs, per lura montar ellas sin il plazzal.
Per il chantun è quai l'emprima giada ch'i dat ina collavuraziun da questa dimensiun sur l'entir chantun ora.
La gronda sfida era d'empustar la massa da laina avant che la planisaziun per il nov edifizi è insumma stada a fin. Las lavurs sajan succedidas fin uss tenor l'urari. L'edifizi avess d'esser a fin il 2028.
Festa da ventschidas sco proxima etappa
Ils proxims mais cuntinueschan las lavurs da la construcziun e l'edifizi vegn a crescher auzada per auzada. L'atun 2026 vegn la construcziun brutta ad esser terminada.
Sche tut va tenor plan po il nov center da Scola auta spezialisada vegnir occupà il mez dal 2028.
-
Bild 1 von 3. Bildquelle: RTR.
-
Bild 2 von 3. Andreas Kohne, l'architect chantunal e responsabel per il project. Bildquelle: RTR.
-
Bild 3 von 3. Bildquelle: RTR.
Ils custs totals per il project general importan 178 milliuns francs. Il Cussegl grond ha approvà il credit d'impegn da 151 milliuns francs l'october 2022, il pievel grischun ha acceptà il project il mars 2023.