Ils pretschs da laina che creschan, n'han anc betg influenzà la racolta da laina en il Grischun. Quai concluda l'Uffizi da guaud e privels da la natira dal chantun sin basa da la racolta 2021. Uschia èn vegnids racoltads l'onn passà totalmain 340'000 meters cubic laina en il guaud grischun. Quai correspunda a las racoltas dals davos onns.
Plinavant scriva l'uffizi da guaud, che la quantitad da laina racoltada pervi da donns (16%) saja sa reducida marcantamain cumpareglià cun il 2020. Pervi da l'aura bletscha e fraida la primavaira e stad da l'onn passà haja il bau-scorsa gì grev da sa multiplitgar.
Tgira intensiva per in guaud saun
In guaud stabil e saun è la meglra protecziun cunter privels da la natira. L'onn passà las lavurantas ed ils lavurants da guaud tgirà circa 2'400 da las var 122'000 hectaras guaud da protecziun en il Grischun. Uschia è la surfatscha tgirada pia restada constanta. Dus terz da las hectaras tgiradas han pudì profitar l'onn 2021 da contribuziuns federalas e chantunalas da passa 12 milliuns francs.
Biodiversitad e persistenza
L'onn 2021 èn vegnidas tractadas var 400 hectaras guaud da biodiversitad. Latiers tutgan en spezial mesiras a favur dals cots e da las giaglinas da taus.
Per trair a niz en moda persistenta il potenzial da la laina vegn ultra da quai realisà il program «Crana a cabel a lunga distanza». Grazia a quest program èn vegnids racoltads supplementarmain 30'000 meters cubic laina. Quai correspunda circa a 10% da tut la laina racoltada en il chantun Grischun.
