Il pachet da mesiras per las medias da la Confederaziun sustegnia la diversitad regiunala en tut las regiuns ed en tut ils linguatgs naziunals, sco er la democrazia directa. Da quest avis è la regenza grischuna. Ella beneventa perquai expressivamain las mesiras en favur da las medias, sco che la regenza scriva en ina communicaziun.
La diversitad geografica, politica e linguistic-culturala e cunquai er la diversitad da las medias saja da vegl ennà ina finamira centrala dal chantun Grischun. I giaja uss per sustegnair ils rapports regiunals en il radio, en la televisiun, en las gasettas quotidianas ed emnilas, sco era online.