Martin Bühler è ina persunalitad enconuschenta en il Grischun dapi la pandemia da corona. Sco schef dal stab da crisa dal chantun è el stà ils ultims onns en la publicitad sco strusch in'autra persuna en il Grischun. Ch'el na saja betg in politicher versà cun rutina, conceda er il president da la Partida liberaldemocratica dal Grischun, Bruno Claus. El menziuna dentant che Martin Bühler ha studegià politica. L'um da 45 onns è pia in «betg-politicher» ch'è politolog.
«Elecziuns da la regenza èn elecziuns da la persunalitad»
Il president da partida na vesa betg in dischavantatg che lur candidat n'ha betg gronda experientscha politica. Tar las elecziuns da la regenza giaja spezialmain per la persunalitad. E la populaziun enconuschia Martin Bühler dapi dus onns. Fin tar las elecziuns dals 15 da matg saja uss impurtant dad ir tranter la glieud, manegia Bruno Claus. Fin lura vegn il candidat liberaldemocrat ad avair visità bunamain 200 occurrenzas. El vegnia er adina accumpagnà d'ulteriuras persunas da la partida. Saja quai dal cusseglier dals chantuns, Martin Schmid u da la cussegliera naziunala, Anna Giacometti. Els sajan là per sustegnair il candidat e betg per dir tge ch'el haja da far co. Da vulair midar ina persunalitad, saja il pli fallà ch'ins possia far, di Bruno Claus.
La Partida liberaldemocratica sto defender ses sez en la regenza grischuna: Christian Rathgeb na dastga numnadamain betg candidar per in'ulteriura perioda d'uffizi.