En tut las regiuns han las pendicularas pudì augmentar las cifras, quai tant tar las emprimas entradas sco er tar la svieuta da transport. Ils augments èn per part fitg gronds. Tar las emprimas entradas resulta – cun prender la media dals davos 5 onns – tut tenor regiun in augment tranter 9 e 20%.
Er tar la svieuta da transport hai dà bunas cifras: là nodan las regiuns perfin tranter 9 e 30% dapli cumpareglià cun la media d'avant 5 onns.
Per quest svilup positiv dettia pliras raschuns. D'ina vart saja l'aura stada buna – cun bler sulegl, naiv natirala, temperaturas bassas per far naiv e paucas interrupziuns tras vent e lavinas. Er las experientschas cun la pandemia da la stagiun passada ed il return dals giasts ord l'Europa hajan gì in'influenza. Cunzunt durant l'emna haja gì dapli giasts. La gastronomia haja er puspè gì pli autas cifras cumpareglià cun l'onn avant, nua ch'i haja dà restricziuns pervia da corona.
