Ils 8 da mars decida il suveran svizzer davart quatter differents projects da votaziun. Cun smatgar sin il link cotschen pudais siglir sin la fatschenta correspundenta:
- Iniziativa SRG SSR
- Lescha federala davart l'imposiziun da taglia individuala
- Iniziativa per daners bluts
- Iniziativa per in fond per il clima
Iniziativa SRG SSR anc betg propi previsibla
Radund set emnas avant las votaziuns avess cun 52% ina maioritad stgarsa refusà l'iniziativa SRG SSR. 46% da las persunas dumandadas èn s'exprimidas plitost u segir per la reducziun da la taxa da medias da 335 sin 200 francs. Quai resulta da l'emprima retschertga da Gfs Berna per incumbensa da la SRG SSR en connex cun la votaziun dals 8 da mars 2026.
Resguardond il spazi da sbagl statistic correspunda quai a l'entschatta da la fasa principala da la campagna ad ina situaziun da piz a cup – tar ina cumpart da persunas indecisas da 2%.
Champ politic e confidenza en la regenza furman opiniuns
L'iniziativa SRG SSR mussa ina lingia da conflict caracterisà fermamain da la separaziun tranter sanester e dretg. Simpatisantas e simpatisants da la PPS sustegnan fermamain l'iniziativa, entant che votantas e votants da la PS e dals Verds refuseschan cleramain.
Era las votantas ed ils votants da la Partida verd-liberala e dal Center èn per gronda part critics envers l'iniziativa. Aifer la PLD predominescha medemamain l’opposiziun a l’iniziativa – schebain era main marcanta en cumparegliaziun cun tschellas partidas. Las persunas dumandadas ch’èn liadas ad ina partida mussan pia opiniuns tenor quel spectrum da partida.
Ultra da la dimensiun da la politica da partida sa manifestescha però en la discussiun davart l’Iniziativa SRG SSR era la confidenza u disfidanza envers la regenza. Persunas cun disfidanza envers la regenza sustegnan tendenzialmain l’iniziativa, entant che quellas che fidan a la regenza refusan cleramain quella.
Tut en tut sa mussa che las opiniuns davart l'iniziativa èn colliadas fermamain cun las posiziuns da las partidas respectivas e cun la confidenza en la regenza.
Tendenza Gea a l'imposiziun da taglia individuala
En vista da la votaziun davart l'imposiziun da taglia individuala è la tendenza cleramain a favur dal project: avess il suveran svizzer votà radund set emnas avant las votaziuns dals 8 da mars, avessan 64% acceptà la taglia individuala, entant che 30% avessan refusà ella. Anc 6% da las persunas dumandadas en l'enquista èn stadas indecisas mez schaner.
Ferm sustegn da las dunnas
La retschertga da Gfs-Berna mussa che la maioritad da la populaziun ha ina tenuta positiva envers l'imposiziun da taglia individuala. Spezialmain en egl dat la differenza tranter ils genders: 69% da las dunnas sustegnan il project, entant ch'il consentiment tranter ils umens munta a 60%.
En la debatta sa mussa ina tenuta critica entaifer il champ burgais-dretg, en spezial tar la PPS. Cumbain ch'ina stgarsa maioritad da 53% da la basa da la PPS sustegna il project, è l'opposiziun la pli ferma qua: 42% èn ubain segir u plitost cunter, da quai refusan 29% cleramain la lescha. Quai è tranter tut las partidas la quota la pli auta. Tar electuras ed electurs dal Center è l'approvaziun percunter tar 62% – schebain ils delegads dal Center recumondan in Na.
Maioritad per l'iniziativa per daners bluts e cuntraproposta directa
In resultat cler avessi era dà en la votaziun per l’iniziativa per daners bluts e la cuntraproposta directa. 65% da las persunas ch'han fatg part a la retschertga avessan votà mez schaner per la fatschenta, 31% cunter. 4% eran anc indecis.
La cuntraproposta directa dal Cussegl federal e dal parlament vegn sustegnida en moda sumeglianta: 67% èn s'exprimids radund set emnas avant la votaziun per quest intent. En la dumonda decisiva èsi da sentir ina preferenza per il cuntraproject.
Consentiment crescha cun vegliadetgna
Las differenzas tranter las generaziuns èn considerablas. Uschia s'augmenta per exempel il consentiment cun la vegliadetgna creschenta.
Er las caracteristicas socio-economicas èn marcantas. Persunas cun ina furmaziun bassa e cun entradas pli bassas s'expriman surproporziunalmain per l'iniziativa da daners bluts. Tar participantas e participants a la retschertga cun pli auta furmaziun ed entradas crescha la tendenza ad in Na.
Ferm cuntravent per il fond per il clima
Sche la populaziun svizra avess decis mez schaner avessan 60% da las votantas e dals votants decidì cleramain u plitost cunter l'iniziativa per in fond per il clima. Be 35% fissan stadas per l'iniziativa, entant che 5% n'han betg exprimì in'opiniun.
Uschia munta l'avantatg dals adversaris a 25 puncts procentuals; l'iniziativa parta cleramain or d'ina posiziun defensiva en la fasa principala da la campagna.
Politica da la partida dominescha
L'opiniun davart l'iniziativa è gia relativamain consolidada: 64% da las votantas e dals votants han ina clera intenziun da votar, entant che 31% tendeschan en ina direcziun ma n'èn anc betg segirs, e 5% restan indecis.
94% dals Verds e 81% dals aderents da la PS sustegnan l'iniziativa. Percunter refusan 86% da votantas da la PPS ed 81% dals votants da la PLD l'iniziativa. Er il Center (63% Na) refusa per gronda part la fatschenta. Medemamain sa mussan las persunas senza partida (58% Na) per gronda part scepticas.
