Il dumber d'utschels va sin l'entir mund enavos marcantamain. Tar prest la mesadad da las 11'000 sorts d'utschels ch'i dat daventa la populaziun adina pli pitschna, quai mussa il nov rapport da BirdLife International. Be tar 6% crescha la populaziun. Mintga otgavla spezia stat sin la glista cotschna da las spezias periclitadas.
En Svizra saja la situaziun ordvart dramatica. Qua stattan 40% da las 205 spezias d'utschè cuader sin la glista cotschna. Sin la glista da preavertiment sa chattan en congual internaziunal dapli che dubel uschè blers utschels, quai cun 20% da las spezias. Uschia è bler dapli che la mesadad da las spezias d’utschels cuaders svizzers en ina situaziun critica.
La pli gronda smanatscha per ils utschels èn tenor il rapport l'intensivaziun da l'agricultura u er la runcada da guauds. L'organisaziun da BirdLife pretenda perquai mesiras urgentas. Tranter auter stoppian vegnir segiradas las surfatschas ch'èn impurtantas per salvar la biodiversitad ed ils utschels.
