Schelira anc cura che bler aveva gia cumenzà a chatschar, blera plievgia, inundaziuns sco era ferma granella han flaivlentà massivamain las culturas quest onn.
Granezza da paun hajan ins racoltà 30% pli pauc ch'usità, tartuffels medemamain, tartuffels da producziun biologica schizunt 50% pli pauc. Quai scriva il servetsch d'infurmaziun agricul. Anc mender guarda la bilantscha ora tar las primblas cun racoltas da 40% da la media da tschintg onns u tar las apricosas cun be 35% da la racolta usitada.
Mailers, ampuaunas e frajas n'han betg patì uschè ferm
La racolta da maila percunter è stada pli u main tuttina sco l'onn passà. Er tar las coclas sco frajas u ampuaunas correspunda la racolta a la media da tschintg onns. Las capriolas da l'aura han però betg mo donnegià las culturas, mabain era laschà enavos fastizs tar l'infrastructura e chaschunà donns da plirs milliuns francs.
