La mesemna – il di avant ch'ils dazis èn ids en vigur – han durant in'ura la presidenta da la Confederaziun, Karin Keller-Sutter, ed il minister d'economia, Guy Parmelin, discutà cun il minister da l'exteriur dals Stadis Unids, Marco Rubio – da las 10:15 fin las 11:15 (temp local). A la fin discurra Keller-Sutter d'in «bun inscunter». Dapli detagls na numna ella dentant betg. Er Guy Parmelin, il minister d'economia da la Svizra, intuna ch'i saja stà in bun discurs. Ins haja tematisà ils contracts bilaterals e la situaziun cun ils dazis.
La finamira dals discurs era, da far als Stadis Unids ina «purschida attractiva», uschia ch'ils dazis vegnan sbassads. Sco quai ch'i para aveva il Cussegl federal era elavurà «novas ideas» e «novs puncts da partenza» per ils discurs. Quai cun la finamira da preschentar ina nova offerta als Stadis Unids – in'offerta pli interessanta. Ins è pia pront da far ulteriuras concessiuns. Tgeninas n'è però betg enconuschent – i dat però pliras opziuns.
Suenter il discurs cun Karin Keller-Sutter e Guy Parmelin da la mesemna, ha il minister da l'exteriur dals Stadis Unids, Marco Rubio, s'exprimì via la plattafurma X. Uschia hajan ins en il discurs suttastritgà l'impurtanta da la collavuraziun en la defensiun. Plinavant hajan ins era discutà davart las relaziuns da commerzi dals dus pajais.
Dazis èn en vigur
Per la Svizra valan uss dazis da 39% sin exports svizzers en ils Stadis Unids. Quels valan dapi gievgia, ils 07-08-2025, a las 06:00 (temp svizzer). Il Cussegl federal è turnà da Washington.
Investiziuns, armas u gas
Pussaivel fiss d’augmentar l’empermischun d’investiziuns da la Svizra en ils Stadis Uni. Tenor ils experts era en dumonda vegniss da cumprar dapli armas, ieli u gas. L’UE ed auters stadis han gì success cun questa strategia. Sper quai fissi era pussaivel da reducir u gist dismetter ils dazis svizzers per products agriculs dals Stadis Unids. Ins stuess bain quintar cun la resistenza massiva dals purs, ma cun augmentar ils pajaments directs pudess ins quietar quels, vegn discutà.
La regenza a Berna spera da svelt pudair contrahar da nov. Il plan da temp vegn pli e pli stretg, cunquai ch'ils dazis da 39% duain gia ir en vigur proxima gievgia, ils 7 d'avust. Ins veglia dentant far il pussaivel. Sch’ils dazis giessan tuttina en vigur vul il Cussegl federal reducir l’effect negativ per las interpresas svizras. Quai cun l’instrument da l’indemnisaziun per la lavur reducida. Da vart da las partidas vegn era discutà da reducir il burdi fiscal e la birocrazia per las interpresas svizras.
Schoc da dazis
Il president american aveva annunzià il venderdi surpendentamain auts dazis da 39% sin rauba da la Svizra. In schoc, spezialmain per l'economia ch'exportescha. Ils dazis da 39% per la Svizra èn cleramain dapli ch'ils 10% che valevan dapi l'avrigl – e dapli ch'ils 31% ch'ins ha considerà en Svizra sco «worst case».
Il minister d’economia grischun Marcus Caduff è surstà dals dazis americans. I mussia ina giada dapli che quai n’haja nagin sistem. Per l’economia saja quai uss dentant in grev burdi da purtar, sch’i na dettia nagin’autra schliaziun.
Er intginas interpresas en il Grischun exporteschan products en ils Stadis Unids. Tenor Marcus Caduff vegnan quellas probabel ad ir en auters pajais da l’Europa a producir, nua ch’ils dazis èn pli bass. Quai che muntia per il Grischun ch’ins vegnia a perder plazzas da lavur.
La Svizra emprovia vinavant da chattar in cumpromiss cun ils Stadis Unids, hai num da vart dal Departament federal d’affars exteriurs. Ina sfida sajan ils novs dazis cunzunt per las firmas ch’exporteschian bler, e per lur furniturs – pia l’industria d’uras, ils producents da maschinas e d’instruments da precisiun sco er l’industria da mangiativas. Per mantegnair plazzas da lavur fetschia la Svizra vinavant diever da l’indemnisaziun per lavur reducida, hai num da vart dal Departament federal da finanzas.
Fin a la fin sperava il Cussegl federal ch'i dettia ina soluziun per tractativas cun ils Stadis Unids. Tenor rapports en il Tages-Anzeiger ed en la NZZ ha la regenza americana gia acceptà il cumenzament da fanadur ina cunvegna da princip en la dispita da dazis tranter la Svizra ed ils Stadis Unids. I mancava dentant il consentiment dal post suprem a Washington.
Avant aveva la presidenta da la Confederaziun Karin Keller-Sutter scrit sin X, ch'i n'hajan chattà nagina cunvegna davart la decleraziun d'intenziun negoziada tranter la Svizra ed ils Stadis Unids. Avant ch'il termin scadia haja ella gì in ultim discurs cun Trump. Per el haja il deficit commerzial prioritad.