Il procuratur public general Michael Lauber sto sa preschentar per in'audiziun a la cumissiun da la dretgira. Quella audiziun ha lieu ils 20 da matg, mesemna proxima. Quai ha la cumissiun da la dretgira decis oz.
Ella vegn a decider suenter questa audiziun, sch'ella instradescha definitivamain ina procedura da relaschada d'uffizi cunter Lauber. La cumissiun da la dretgira stoppia sa tegnair stretg vi dals fatgs e vi da las leschas per garantir ina procedura gista e dal stadi da dretg, ha ditg il president Andrea Caroni.
Reelecziun dispitaivla l'atun passà
La reelecziun da Michael Lauber l'atun passà è stada dispitaivla. La raschun èn stads inscunters betg documentads cun il schef da la FIFA, Gianni Infantino, il mument che la Procura publica federala manava differentas proceduras cunter la Federaziun internaziunala da ballape.
