Il plan d'acziun per reducir il diever d'erbicids en l'agricultura mussa effect. Tenor l'Uffizi federal d'agricultura cumbattian puras e purs pli savens il zerclim senza duvrar erbicids. Metodas alternativas, sco per exempel roboters che zerclan, vegnian duvradas pli savens. Il 2020 hajan ins uschia pudì cultivar 21% da las surfatschas per legums e vignas sco er 16% dals èrs averts senza erbicids. Quai èn 30% dapli che anc il 2019. Plinavant hajan ins pudì reducir ils erbicids en l'aua, perquai ch'i haja dà dapli lavandarias per schubregiar las maschinas purilas.
Il 2017 aveva la Confederaziun lantschà il plan d'acziun che vul reducir ils ristgs da pesticids ed erbicids per cumbatter zerclim. Medemamain duain metodas alternativas vegnir promovidas. Il project n'è però betg indispitaivel. Cun la finamira na para nagin d'avair problems – per la via da cuntanscher ella na datti però nagin consens.
