Il resultat è fitg cler. Cun excepziun da Basilea-Citad han tut ils chantuns ditg Na a l'iniziativa. Prest 65% da tut ils votants e votantas èn cunter quella. Relativamain stretg èsi stà en ils chantuns Genevra e Turitg, cun 52,7%, respectivamain 53,4%.
Allevament intensiv
Svizra: Iniziativa cunter l’allevament intensiv
-
GEA
1'062'674 Vuschs
-
NA
1'798'962 Vuschs
Vuschs dals chantuns
- GEA
- Na
Reacziuns Svizras
Adversaris
Martin Rufer, directur da l'Uniun purila da la Svizra, è fitg led che l'iniziativa ha fatg naufragi. Quella avessi gì fitg negativas consequenzas per l'agricultura.
Per Markus Ritter, president da l'Uniun purila da la Svizra, datti trais motivs daco che l'iniziativa ha fatg naufragi:
- Ins haja pudì declerar fitg bain che la Svizra haja gia ina fitg stricta lescha per la protecziun dals animals.
- Ils products da bio che l'iniziativa ha pretendì sajan gia disponibels en stizun.
- In Gea a l'iniziativa avess chaschunà fitg gronds custs.
Aderents
Il Cusseglier naziunal Felix Wettstein dals Verds è tuttina cuntent ch'i ha dà l'iniziativa. Quai haja meglierà la conscienza per il bainstar dals animals tar la populaziun. I dovria numnadamain midadas.
Nus avain da memia animals, e quels fan da memia puschina.
Era per Philipp Ryf, co-manader da la campagna, èsi positiv che la populaziun è uss pli conscienta da la situaziun e sa co l'agricultura d'ozendi vesa ora. Els hajan era gì bler pli paucas resursas ch'ils adversaris da l'iniziativa.
Cler resultat era en il Grischun
Il Grischun na vul betg scumandar ina tratga intensiva da giaglinas, bovs u pors: Passa 65% dals votants e votantas din Na a l'iniziativa cunter l'allevament intensiv. Sco quai che la chanzlia chantunala communitgescha, èn ils resultats definitivs. A la votaziun èn sa participadas 49,65% da las persunas cun dretg da votar.
Tut las vischnancas Grischunas din Na a l'iniziativa. Il pli ferm Na vegn da Rongellen, cun 87,5% da tut las vuschs. Cun 44,82% vuschs Gea ha Cuira il resultat il pli gulivà dal chantun.
Reacziuns Grischunas
Thomas Roffler, president dals purs Grischuns è levgià dal resultat. Il motiv per il naufragi vesa el tar la formulaziun fitg extrema da l'iniziativa. Tut ils bains purils avessan stuì tegnair animals tenor standard da bio, uschia fiss la charn vegnida pli chara.
Era Nicolas Zogg, co-president da la partida verda grischuna, vesa sumegliants motivs. La bursa ed ils daners hajan giugà ina gronda rolla. Plinavant n'hajan els forsa betg pudì mussar si il problem sco tal, numnadamain ch'i dat en Svizra betg mo ils bains purils idillics, mabain era ina industria.
Tge leva l'iniziativa?
L’iniziativa vuleva fixar en la Constituziun federala da tegnair animals da niz cun dignitad. In allevament intensiv, per exempel da bovs, giaglinas e pors dueva vegnir scumandà. La Confederaziun duess relaschar reglas per il plaz dals animals en stalla, l’access en il liber e la meztga. Quellas duain correspunder a las directivas da Bio-Suisse 2018 – er per l’import d’animals e da products d’animals.
