En l’avegnir vul l’armada pudair defender meglier la Svizra. Perquai ha ella preschentà ina nova strategia. La guerra russa cunter l’Ucraina saja stada il cumenzament d’ina nova èra, ha ditg il schef da l’armada Thomas Süssli.
Metter focus sin la defensiun
La situaziun da segirezza en l’Europa saja vegnida mendra. Per pudair proteger er en il futur ed uschè bain sco pussaivel sia incumbensa centrala – la Svizra e sia populaziun – stoppia ella rinforzar sia abilitad da sa defender en tuts aspects (terra, aria, spazi da cyber, spazi electromagnetic, univers e spazi d'infurmaziun).
Investiziun da 13 milliardas francs
Enfin ils onns 2030 vul l’armada investir var 13 milliardas francs. Profitar da quests daners duain il persunal, il material e la tecnica. Plinavant vul l’armada era collavurar pli ferm cun la Nato, l’UE ed ils stadis vischins.
L'attatga da la Russia saja atgnamain ina cesura, ha ditg il schef da l'armada Thomas Süssli avant las medias. Quest return a la politica da pussanza chaschunia dapli rearmamenten l'Europa. L'armada svizra saja dentant in product da la refurma «armada 21» cun il qual l'armada haja survegnì incumbensas da protecziun.
Segnads n'èn ils plans politicamain anc betg. Il rapport che Süssli ha preschentà duai dentant prescriver la direcziun.
