Siglir tar il cuntegn

Header

cuntegn

Bilantscha annuala Bunamain 2'400 reclamaziuns pervi da pretschs auts

Il survegliader dals pretschs, Stefan Meierhans, ha survegnì l'onn passà 60% dapli reclamaziuns da burgaisas e burgais ch’il 2021. Quai ha communitgà il survegliader dals pretschs a chaschun da sia bilantscha annuala. D’attribuir saja quai a l’inflaziun auta.

Pretschs d'energia èn stads en il focus

Las bleras annunzias han pertutgà pretschs e tariffas dal sectur d’energia. Radund 30% da las 2’368 annunzias han pertutgà quest sectur. Sin il segund plaz cun 13% suondan annunzias pertutgant il sectur da la sanadad, suandà da la telecommunicaziun cun bunamain 6%.

L'entschatta da l'onn passà ha el adattà sias prioritads. El è sa focusà sin ils pretschs da stgaudar e da carburant ed ha pretendì da las interpresas responsablas per il provediment d’energia da duvrar reservas dals onns passads per mitigiar ils augments dals pretschs. Per fortuna hajan questas recumandaziuns chattà suatientscha en plirs cas – ha bilantschà Meierhans.

Focus 2023 sin il maun public

Per l'onn 2023 ha il survegliader da pretschs er mess il focus sin las tariffas dal maun public u da firmas ch’han quasi in monopol al martgà. Radund in terz dals pretschs en la Svizra tutgan en questa categoria. Stefan Meierhans pretenda da sa retegnair e giuditgar ils pretschs administrads cun bun egl. Ins duai era tschertgar il potenzial pussaivel da levgiar la chargia sin il consuments e las consumentas.

Ma era ils pretschs da l'energia e las lavurs ch'el ha cumenzà en il sectur da victualias stattan vinavant en il focus. Per exempel ha il TCS lantschà ina app da cumparegliar ils pretschs da carburant. Là èsi uss da controllar sche quai ha l'effect giavischà.

audio
Per tadlar: curt e cumpact
ord RTR Audio dals 27.02.2023.
laschar ir. Durada: 1 minuta 11 Secundas.

RTR novitads 12:00

Artitgels legids il pli savens