Durant la sessiun da primavaira, han duas da trais parlamentarias e parlamentaris sa laschà testar sin il coronavirus cun in test spert. Quai mussa la statistica ch'ils servetschs dal parlament ha publitgà. Tut ils parlamentaris e las parlamentarias han gì la chaschun da sa laschar testar voluntariamain durant la sessiun. Quai fin a duas giadas l'emna.
Pregiar aua, baiver vin
En Chasa federala èn dentant uschiglio tuts dal medem avis: I sto vegnir testà en Svizra – e quai bler. I dovria ussa tests cumplessivs, aveva la PPS scrit fin schaner e pretendì tests tar las interpresas. La PS aveva scrit il favrer ch'i saja necessari da far uschè blers tests sco pussaivel.
Barbara Gysi da la PS e politicra da sanadad, è da l'avis che questa quota bassa da 65%-70% saja turpegiusa. «Qua discurrin nus d'ina offensiva da testar, pretendain da la populaziun da sa laschar testar e lura van strusch dapli che dus terzs dal parlament a sa testar.»
Tut auter vesa quai il cusseglier dals chantuns da la PLD, Thomas Hefti. El è en il gremi da l'administraziun dal parlament, il gremi che ha decidì ils tests da massa per il parlament: «Passa dus terzs è in bun resultat», di el. Surtut sch'ins vesia quants che sajan negativs, quai saja raschun d'avair plaschair.
Be in test positiv
Durant tut las trais emnas hai dà be in test positiv. Forsa hajan perquai intginas persunas sa sentì segiras e n'hajan lura betg testà, suppona il politicher da sanadad da la PPS, Albert Rösti. El è er da l'avis che 70% saja ina buna quota, resguardà ch'ils tests sajan stads voluntaris.
