En Svizra duai dar in sistem da cunfin e da test cumplessiv. Quai pretendan las presidentas ed ils presidents da tut las grondas partidas – da la PPS fin ils Verds – en ina brev cuminaivla al Cussegl federal. Quai rapporta la «SonntagsZeitung». Els pretendan che persunas ch’entrian en Svizra stoppian preschentar in test da PCR or far in test svelt. Ed er sch’il test saja negativ, duaja valair ina quarantina dad almain tschintg dis.
Reglas pli severas per frontaliers
Er cunfinaris na duajan betg pli dastgar entrar senz’auter en Svizra, mabain duajan vegnir testads sistematicamain – e quai da las firmas ch’occupeschan els.
GDK vul reducir temp da quarantina
Ina pitschna maioritad dals chantuns vul reducir il temp da quarantina da 10 sin 7 dis. La premissa è ch’in test da corona è negativ suenter 7 dis. Quai ha communitgà la Conferenza svizra da las directuras e dals directurs chantunals da sanadad (GKD). Bain saja ina reducziun da la quarantina actualmain da valitar precautamain, dentant saja quai in’opziun giustifitgabla sut la premissa menziunada.
Plinavant vulan ils chantuns che persunas, che vegnan d’in pajais da risico, stoppian en l’avegnir mussar in test da PCR negativ.
Ord l'archiv
Quest mument cura che ti survegnas in telefon ed i ha num che ti stos ir en quarantina... Enconuschas? Nossa redactura Nina raquinta en ses vlog da quest mument e da ses diesch dis en quarantina.
