Genevra sut squitsch
Diversas instituziuns internaziunalas a Genevra èn sut grond squitsch – tranter auter perquai ch'ils Stadis Unids han scursanì u insumma sistì il sustegn finanzial. Pertutgada da quest pass dals Stadis Unids è per exempel l'organisaziun da sanadad mundiala WHO ch'ha sia sedia a Genevra, ma era l'agid umanitar. Er auters stadis han suenter ils Stadis Unids retratg lur contribuziuns per diversas organisaziuns da las Naziuns Unidas. Questas decisiuns hajan era gì consequenzas per las organisaziuns cun sedia en Svizra e procurà per sminuziun da budget e pliras relaschadas a Genevra.
Il minister per l'exteriur, Ignazio Cassis, discurra d'ina crisa da collavuraziun tranter ils stadis e vul uss perquai rinforzar la rolla da Genevra sco «centrum global per la diplomazia multilaterala».
Cussegl federal vul reagir «svelt e decis»
Cun il pachet da mesiras veglia il Cussegl federal trametter in signal cler a la concurrenza internaziunala, declara il minister per l'exteriur, Ignazio Cassis. Auters pajais, sco per exempel il Katar u intgins stadis vischinants, emprovian numnadamain da gudignar las organisaziuns internaziunalas per sasez. La Svizra saja pia sut squitsch da defender la rolla sco pajais ospitant e la relevanza da l'uschenumnà «Genevra internaziunal».
Questa investiziun reflectescha in consens vast ed a lunga vista da noss pajais.
Grazia al pachet da mesiras duai l'infrastructura vegnir meglierada e credits duain vegnir mess a disposiziun ad organisaziuns impurtantas. Cassis ha punctuà che quai na saja betg ina decisiun «nostalgica», mabain in'investiziun en l'avegnir d'in urden mundial che sa basa sin il dretg, reglas e sin bainvulientscha.
Genevra sco «carta da visita« per la Svizra
Il «Genevra internaziunal» na saja betg be da gronda impurtanza per la diplomazia globala, mabain era per la Confederaziun, declara Ignazio Cassis: «El è ina carta da visita per la Svizra.» La Confederaziun saja s'engaschada ils ultims quatter onns cun stgars 2 milliardas francs per promover la citad internaziunala.
Cun l'investiziun veglia il Cussegl federal signalisar in sustegn cler per il «center global per la diplomazia multilaterala» – e quai era en temps nua che la collavuraziun tranter plirs stadis è adina pli periclità.