En Svizra n’èsi betg lubì da survegnir cun in autotest da l’apoteca in certificat da Covid. Dentant precis quai porscha ina nova plattafurma dapi bundant in’emna. Ils tests vegnan offrids per 20 francs. Quai è in toc pli bunmartgà ch'ils tests ch’ins po far en ils centers da testar.
I saja l’intent da pudair porscher in certificat bunmartgà. Ins vul era pudair porscher ina varianta svelta e simpla per survegnir in certificat scrivan ils iniziants sin la pagina d’internet. Il problem è dentant ch'en Svizra n’èsi betg lubì ch'autotests portan ad in certificat, scriva il BAG sin dumonda. Perquai collavura la plattafurma cun partenaris da l’Uniun europeica ch’èn certifitgads per far tals tests.
Sin la plattafurma vegnan ins collià per video cun ina persuna dal fatg da l’UE e cun quella fan ins ensemen il test. Sche quel è negativ survegnan ins in certificat da l’UE. Cun quai che quel è cumpatibel cun il svizzer, po quel vegnir chargià sin la Swiss Covid App.
Il BAG sclerescha uss sche quella metoda da la plattafurma è legala u betg.
