Il Cussegl federal ha decidì che la Svizra duai daventar neutrala pertutgant il clima fin l'onn 2050.
Ferma plievgia, auazuns, crudada da crappa – tut quai vegni a dar en avegnir anc pli savens. Vul era dir ch'ils custs per l’infrastructura creschan.
La finamira da naginas emissiuns, duai era esser ina schanza per l'economia. Novas tecnologias en favur dal clima duain vegnir sustegnidas pli fitg e sche pussaivel era vegnir exportadas.
La schelira permanenta en las alps sdreglia vinavant, e nus stuain far quint che pli u main tut ils glatschers svaneschan. Uschia avain nus pli pauc'aua a disposiziun per l’agricultura e per il provediment d’energia.
La cussegliera federala Simonetta Sommaruga ha intunà che da tegnair la temperatura pli bassa pussaivel saja gist per la Svizra fitg impurtant cunquai che la temperatura creschia qua tenor ils scienziads dubel uschè svelt sco en media sin il rest dal mund.
Il departament federal per ambient, traffic, energia e communicaziun vul elavurar ina strategia da clima per la fin da l'onn 2020.
RR novitads 17:00
