Confederaziun - Nova strategia encunter criminalitad organisada
La Confederaziun ha per l'emprima giada ina strategia encunter la criminalitad organisada. Il Cussegl federal ha approvà quella a chaschun da sia sesida dals 19 da december.
Europol ha l'onn 2023 constatà che passa 800 organisaziuns criminalas èn activas en l'Europa. Bleras da quellas era en la Svizra – e quai oravant tut en la vendita da drogas, da traffitgar persunas, lavar daners en il gieu da fortuna illegal.
Cun la nova strategia vul la Confederaziun simplifitgar la collavuraziun tranter vischnancas, chantuns e Confederaziun – sco era sur ils cunfins ora. Las organisaziuns criminalas nizzegian tecnologia ed en era prontas da duvrar violenza, scriva il Cussegl federal en ina communicaziun. La Svizra saja pervi da sia posiziun amez da l'Europa, pervi da la buna infrastructura e pervi dal plaz da finanzas attractiva per la criminalitad organisada. Perquai dovria quella nova strategia che ha trais finamiras.
identifitgar organisaziuns criminalas
impedir organisaziuns criminalas
cumbatter organisaziuns criminalas
Identifitgar
Cun mesiras per sensibilisar administraziuns, l'economia e la societad vulan ins far enconuschent il risico che la preschientscha da la criminalitad organisada porscha per la Svizra. La polizia federala fedpol fa gia uss scolaziuns per mussar a l'administraziun co enconuscher las activitads e praticas da las organisaziuns criminalas. Plinavant duai dar adattaziuns giuridicas per ch'organisaziuns ed administraziuns possian annunziar pli simpel activitads suspectusas a la polizia.
Impedir
Grazia a la strategia duain Confederaziun, chantuns e vischnancas intensivar la collavuraziun. Tranter auter vulan ins crear la basa giuridica per pudair barattar infurmaziun sin tut ils stgalims. Sin livel federal duain mesiras preventivas vegnir elavuradas – entras quai duai la Confederaziun pudair confiscar pli spert daners e facultads d'organisaziuns criminalas.
Cumbatter
Era per il cumbat da la criminalitad organisada è il barat d'infurmaziuns il pli impurtant, era cun partenaris da l'exteriur. Perquai vul il Cussegl federal intensivar la collavuraziun cun l'exteriur e nizzegiar meglier instruments existents – per exempel che teams da plirs pajais collavurian pli stretg tar cas cumplex.
Mesiras senza midadas da lescha
Avrir la boxSerrar la box
Rapport da situaziun actuala
In element central da la strategia è la creaziun d'in rapport da la situaziun actuala davart las gruppaziuns da criminalitad organisada e lur activitads. Las autoritads han basegn da infurmaziuns detagliadas davart las colliaziuns naziunals e internaziunals e fenomens novs sco la recrutaziun tras raits socialas.
Sensibilisaziun e scolaziun
Scolar e sensibilisar politica ed economia per enconuscher meglier la criminalitad organisada. Secturs particularmain periclitads sco il sectur da finanzas e il gieu da cletg èn en il focus.
Affluenza d'infurmaziuns
Definir posts d'annunzia per cas suspectus, cunquai che l'experientscha mussa che collavuraturs d'uffizis vesan savens acziuns suspectusas, na san actualmain dentant betg nua annunziar.
Collavuraziun naziunala e internaziunala
Las polizias chantunals creeschan in gremi che sa fatschenta cun e coordinescha sin livel federal ils cas cumplexs da la criminalitad organisada. Plinavant vegn intensivada la collavuraziun internaziunala.
Resursas
Il Parlament ha incumbensà il Cussegl federal da crear fin 200 novas plazzar tar la Polizia criminala federala entaifer dals proxims 10 onns.
La lavada da daners suspectus è spezialmain en il focus en Svizra. La strategia prevesa mesiras per simplifitgar da proseguir e cumprovar la lavada da daners ed era da simplifitgar da confiscar facultads suspectusas.
Sco terz punct duai era il dretg penal vegnir adattà per simplifitgar la rimnada da cumprovas e dar a la procura publica dapli pussaivladads da sancziunar acts criminals.
Resursas per il cumbat
Il Departament federal da polizia evaluescha enfin la fin dal 2026 variantas per la finanziaziun dal Post d'annunzia da cas da lavada da daners suspectus (MROS). Plinavant vegn fatg in plan per auzar la capacitad da la Polizia criminala federala. Il Parlament ha era incumbensà il Cussegl federal da crear fin 200 novas plazzar tar la Polizia criminala federala entaifer dals proxims 10 onns.
Implementaziun da la strategia
Il Departament federal da polizia e giustia vegn ad elavurar in plan d'acziun naziunal enfin la fin dal 2026. Quai ensemen cun la Conferenza chantunala da directurs e directuras da polizia e giustia, cun ils chantuns, posts responsabels da la Confederaziun e vischnancas. Part dal plan fan mesiras concretas, responsabladads ed in plan da temp.
Mesiras che pretendan midadas da leschas
Avrir la boxSerrar la box
Affluenza d'infurmaziuns
Actualmain na datti betg en tut ils chantuns las medemas reglas per collavuraturas da l'administraziun d'annunziar cas suspectus. Per part na datti gnanc il dretg da dar vinavant infurmaziun perquai ch'ins surpassas il secret d'uffizi.
Confederaziun e chantuns stgaffeschan uss la basa legala per pussibilitar a collavuraturs e collavuraturas da far talas annunzias senza surpassar il secret d'uffizi.
Collavuraziun naziunala
Actualmain manca la basa legala per barattar infurmaziuns tranter differents uffizis ed organisaziuns privatas che fan controllas per il maun public.
I vegn stgaffì la basa legala per pudair barattar infurmaziuns per pudair coordinar p. ex. controllas da restaurants. Cun quai duai dar in maletg cumplessiv da pussaivlas acziuns criminalas.
Barat d'infurmaziuns tranter polizias
Igl exista gia ina plattafurma naziunala per infurmaziuns da cas da la polizia, quel è era collià cun ils sistems da l'UE. La colliaziun cun las polizias chantunalas n'è dentant per part betg dada, perquai che la basa legala manca.
I vegn creà la basa legala per che tut las polizias en Svizra hajan access a tut las datas.
Collavuraziun internaziunala
Actualmain èsi per partenaris da l'exteriur fitg cumplitgà dad arrestar ina persuna en la Svizra, sche quella n'ha betg cuntrafatg a la lescha directamain en la Svizra.
En il futur duain las polizias da la Svizra collavurar pli direct cun partenaris da l'exteriur e far part da las inquisiziuns. Entras quai vegn la persecuziun simplifitgada.
Battaglia cunter la lavada da daners
Il Departament federal da polizia e giustia elavurà mesiras giuridicas per simplifitgar la cumprova da la lavada da daners suspectus. Enfin uss sto era vegnir cumprovà da tge acziun illegala ch'ils daners vegnan concrets.
Simplifitgar mesiras tar controllas
Actualmain vai p. ex. tar ina controlla da traffic fitg ditg enfin ch'ina dretgira lubescha da controllar in telefonin. Per part han las persunas suspectusas gia puspè bandunà la Svizra. Il EJPD vul elavurar midadas da lescha per simplifitgar controllas e per evitar che cumprovas vegnan destruidas, p. ex. cun access or da la distanza sin telefonins, avant ch'ins po elavurar las datas.
Las mesiras che pretendan midadas das leschas sin livel federal dovran pli blera lavur e duain vegnir sco pachet. Ellas èn pli probabel prontas per la consultaziun a la fin dal 2027.
Las mesiras che na dovran naginas midadas da leschas vegnan implementadas en il decurs dal 2026 sin livel federal e chantunal. Quellas mesiras cumpiglian tranter auter la scolaziun da persunal en il sectur da finanzas u immobiglias, da definir tgi che po vegnir contactà per cas supponids da criminalitad organisada e la meglieraziun da la collavuraziun da la polizia en Svizra e cun l'exteriur.
