Quai vala:
- Persunas cun difficultads cun il trair flad u problems cun las vias respiratoricas duain exnum purtar mascras d'igiena e da diever unic.
- A la populaziun en general vegn cusseglià da purtar mascras da taila ch'èn producidas a moda industriala u mascras d'igiena da diever unic.
- Il BAG na preferescha nagina varianta.
BAG ha dementì novitad da Keystone-SDA
Sin dumonda da SRF ha l'Uffizi federal da sanadad dementì da recumandar da nov mascras da taila sco nov standard. Da la recumandaziun sa tractia dad ina faussa novitad. Da nov recumondia il BAG sulettamain a persunas ch’hajan difficultads cun la vias respiratoricas d'exnum purtar mascras medicinalas a diever unic. Il BAG accentuescha che tant mascras da taila sco er mascras igienicas protegian cunzunt autras persunas d'ina infecziun cun il coronavirus.
Ordavant avevan pliras medias – tranter auter er RTR e SRF – derasà ina novitad sin basa da las infurmaziuns da l'agentura da novitads Keystone-SDA. Entant ha er Keystone-SDA curregì sia novitad ed è s'exculpada.
Pretensiun da «Greenpeace»
Avant intgins dis aveva l'organisaziun per la protecziun da l'ambient «Greenpeace» tschentà ina dumonda correspundenta a la Confederaziun. Quai cun l'argumentaziun che mascras da taila reutilisablas protegian bain avunda la maioritad da la populaziun. Plinavant possia in'ulteriura mancanza da mascras da protecziun vegnir evitada ed er la polluziun da l'ambient vegnir reducida.
