La regenza grischuna propona da schluccar tut las mesiras da corona ils 17 da favrer. Ella s'exprima cunquai per la varianta 1 ch'il Cussegl federal ha tramess en consultaziun l'emna passada. Tenor il president da la regenza grischuna, Marcus Caduff, lubescha la situaziun epidemiologica in tal pass grond:
Sche la Svizra abolescha propi las bleras mesiras mez favrer ubain tuttina pass per pass – decida il Cussegl federal proxima mesemna. Oz scada il termin per chantuns ed organisaziuns da prender posiziun.
Tgei dian tschels chantuns?
Il chantun Berna na vul betg pli l'obligatori da certificat davent dals 17 da favrer. Tenor il pledader da la direcziun da sanadad chantunala vulan els abolir tut las mesiras uschè spert sco pussaivel. Ina excepziun fan els tar l'obligatori da mascrinas endadens, quel duai anc restar per trais fin quatter emnas.
Era ils blers auters chantuns che han fin mardi saira gia respundì sin la consultaziun dal Cussegl federal, prefereschan la varianta 1: d'abolir tant sco tut las mesiras da protecziun. Blers vulan dentant salvar l'obligatori da mascrinas per ospitals u en il traffic public.
Ils chantuns Uri e Schwyz vulan era salvar l'obligatori da mascrinas en il traffic public. Sco la regenza dal chantun Luzern scriva, duai quel restar «almain durant ina fasa da transiziun» per «la protecziun da la part da la populaziun ch'è periclitada spezialmain».
Il directur da sanadad dal chantun Giura avertescha perencunter d'esser precaut.
Sche nus cuntinuain pass per pass, vesain nus era meglier ils effects che quels han sin ils ospitals.
Era ils chantuns Basilea-Citad, Turitg e Neuchâtel èn cunter l'aboliziun da tut las mesiras en in pass.
Ils directurs da sanadad han franà
Anc l'emna passada aveva la conferenza dals directurs chantunals da sanadad cusseglià da betg abolir tut las mesiras en ina. Las regenzas dals chantuns èn dentant pli optimisticas. Cunquai che las cifras d'infecziuns van enavos, na vesan blers chantuns nagina raschun da cuntinuar mo pass per pass.
