Siglir tar il cuntegn

Header

cuntegn

Corona Il Grischun e blers auters chantuns vulan abolir tut las mesiras

I na dettia nagin motiv d'abolir las mesiras da corona pass per pass. Blers chantuns vulan ch'il Cussegl federal schlia l'autra emna tut las mesiras.

La regenza grischuna propona da schluccar tut las mesiras da corona ils 17 da favrer. Ella s'exprima cunquai per la varianta 1 ch'il Cussegl federal ha tramess en consultaziun l'emna passada. Tenor il president da la regenza grischuna, Marcus Caduff, lubescha la situaziun epidemiologica in tal pass grond:

audio
Marcus Caduff davart la situaziun actuala
ord RTR Audio dals 09.02.2022.
laschar ir. Durada: 28 Secundas.

Sche la Svizra abolescha propi las bleras mesiras mez favrer ubain tuttina pass per pass – decida il Cussegl federal proxima mesemna. Oz scada il termin per chantuns ed organisaziuns da prender posiziun.

Las duas variantas dal Cussegl federal

Avrir la box Serrar la box
  • Varianta 1: Abolir ils 17 da favrer la situaziun speziala e cun quella er tant sco tuttas mesiras da protecziun. Tranter auter l'obligatori da certificat per ustarias, occurrenzas, indrizs dal temp liber e cultura, l'obligatori da mascrina en lieus publics sco stizuns ed er naginas restricziuns per inscunters privats ed occurrenzas grondas.


Sche la situaziun epidemiologica è memia intscherta propona il Cussegl federal d'avrir a moda pli precauta en plirs pass tenor la varianta 2.

  • Varianta 2: Abolir en in emprim pass l'obligatori da certificat per ustarias, occurrenzas, indrizs dal temp liber e cultura sco er reglas per inscunters privats ed occurrenzas en il liber. Ils chantuns han dentant la cumpetenza da lubir u scumandar tschertas occurrenzas grondas. L'obligatori da mascrina duai restar. La regla da 2G+ duai valair vinavant en discos, bogns u er tar musica cun instruments da flad. Pir en in ulteriur pass vegnissan questas reglas schluccadas.

Tgei dian tschels chantuns?

Il chantun Berna na vul betg pli l'obligatori da certificat davent dals 17 da favrer. Tenor il pledader da la direcziun da sanadad chantunala vulan els abolir tut las mesiras uschè spert sco pussaivel. Ina excepziun fan els tar l'obligatori da mascrinas endadens, quel duai anc restar per trais fin quatter emnas.

Era ils blers auters chantuns che han fin mardi saira gia respundì sin la consultaziun dal Cussegl federal, prefereschan la varianta 1: d'abolir tant sco tut las mesiras da protecziun. Blers vulan dentant salvar l'obligatori da mascrinas per ospitals u en il traffic public.

audio
Variantas da consultaziun – in discurs cun Adrian Camartin
ord Actualitad dals 09.02.2022.
laschar ir. Durada: 4 minutas 27 Secundas.

Ils chantuns Uri e Schwyz vulan era salvar l'obligatori da mascrinas en il traffic public. Sco la regenza dal chantun Luzern scriva, duai quel restar «almain durant ina fasa da transiziun» per «la protecziun da la part da la populaziun ch'è periclitada spezialmain».

Il directur da sanadad dal chantun Giura avertescha perencunter d'esser precaut.

Sche nus cuntinuain pass per pass, vesain nus era meglier ils effects che quels han sin ils ospitals.
Autur: Jaques Gerber directur da sanadad dal chantun Giura

Era ils chantuns Basilea-Citad, Turitg e Neuchâtel èn cunter l'aboliziun da tut las mesiras en in pass.

Ils directurs da sanadad han franà

Anc l'emna passada aveva la conferenza dals directurs chantunals da sanadad cusseglià da betg abolir tut las mesiras en ina. Las regenzas dals chantuns èn dentant pli optimisticas. Cunquai che las cifras d'infecziuns van enavos, na vesan blers chantuns nagina raschun da cuntinuar mo pass per pass.

RTR novitads 10:00

Artitgels legids il pli savens

Scrollar a sanestra Scrollar a dretga