L’affera «Corona-Leaks» aveva scurlattà la Svizra avant dus onns. En il center da l'affera stat la communicaziun per mail tranter il schef da Ringier, Marc Walder, ed Peter Lauener, ch'era lura anc schef da communicaziun dal Departament federal da l’intern – ma las mails na dastgan betg vegnir evaluadas. Quai era la decisiun da la Dretgira da mesiras repressivas a Berna.
Cunter quest scumond vul la Procura publica federala uss però far recurs tar il Tribunal federal. Quai ha ella confermà envers SRF. Ella veglia avair il dretg d'examinar la correspundenza da mail.
Peter Lauener – l'anteriur schef da communicaziun d'Alain Berset – ha survegnì renfatschas, ch'el haja dà vinavant (pia fatg il «leaken») a Reiniger pliras giadas infurmaziuns confidenzials dal Cussegl federal en connex cun la politica da Covid. Cun quai avess Lauener violà il secret d'uffizi.
L'affera ha cumnzà ils 14 e 21 da schaner 2023, cura che la »Schweiz am Wochenende» ha publicà extracts or da la correspundenza da mail. Quels demussan ch'i era vegnì communicà intensivamain.
Tenor la «Schweiz am Sonntag» avev'il «Blick» – ch'è part da la chasa editura «Riniger» – adina enconuschientscha avant che tut tschels da las decisiuns en connex cun Covid. Plinavant saja da en egl, ch'Alain Berset è vegnì representà fitg bainvulent en las medias da «Reiniger».
Examinaziun è vegnida valitada sco illegala
La communicaziun tranter la chasa editura Ringier ed il departament da l'intern areguard mesiras da corona na dastga betg vegnir evaluada. A questa conclusiun era il tribunal da las mesiras repressivas a Berna vegnì. La decisiun sa refereschia tenor il tribunal cunzunt a la protecziun schurnalistica da la funtauna ed al secret redacziunal.
Il tribunal ha confermà in rapport da gasettas da Tamedia. I va per l'uschenumnà «Corona-Leaks» dal 2022. Là era vegnì renfatschà che topfuncziunaris svizzers hajan infurmà las medias da boulevard durant la pandemia ordavant davart mesiras planisadas da la regenza.
L'investigatur spezial da quai temp Peter Marti aveva cunzunt prendì en mira il schef da communicaziun dal departament da l'intern Peter Lauener. L'Uffizi federal d'informatica aveva avert per Marti la box da mails da Lauener. Là ha Marti chattà correspundenza tranter Lauener e Ringier. Che Marti haja examinà quels mails, na saja betg stà legal.