Siglir tar il cuntegn

Header

audio
Chadaina da Fortuna: Tgi che dat vul era savair tgi che profitescha da l’agid
Or da Actualitad dals 22.10.2020.
laschar ir. Durada: 5 minutas 8 Secundas.
cuntegn

Coronavirus: Di da solidaritad RTR e la Chadaina da Fortuna han rimnà passa 4 milluns

Durant 16 uras ha la Chadaina da fortuna rimnà daners ils 22 d'october per sa gidar sin l'entir mund cun persunas che pateschan dal coronavirus. La summa finala da las donnaziuns munta a 4'016'886 francs.

La crisa tutga ils pli flaivels il pli fitg ed intensivescha problems sco inegualitad sociala e povradad sin l’entir mund. A favur da quests carstgauns ha la Chadaina da Fortuna organisà ensemen cun la SRG SSR in di naziunal da solidaritad «Coronavirus internaziunal». Sustegnì vegn la rimnada er da las ovras d’agid partenarias che cumbattan dapi mais las consequenzas da la pandemia.

Gia il mars aveva la Chadaina da fortuna apellà da sustegnair persunas en Svizra. Passa 42 milliuns francs eran vegnids rimnads. Cun ils daners vegnan passa 150 projects da 114 organisaziuns sustegnidas che gidan persunas en Svizra che pateschan spezialmain fitg da las consequenzas da la pandemia.

Sommaruga lantscha l’acziun da rimnada

Gievgia en damaun las set ha la presidenta da la Confederaziun Simonetta Sommargua lantschà il di naziunal da solidaritad da la Chadaina da fortuna. Ella sustegna l’acziun cun ils pleds: «La pandemia dal coronavirus dovra nossa solidaritad – era sur ils cunfins ora.»

La crisa da corona tutgia blera glieud fermamain, era en Svizra, ha la cussegliera federala aschuntà. En pajais che sajan gia en la miseria vegnian ils problems anc pli gronds, sco per exempel paupradad u inegualitad sociala.

video
Il Kikeri6 en favur da la chadaina da fortuna
Or da Giuventetgna dals 22.10.2020.
laschar ir. Durada: 3 minutas 21 Secundas.

RTR actualitad 07:00

Artitgels legids il pli savens