Persunas vaccinadas cunter Covid-19 moran mo fitg darar da u en connex cun il coronavirus. E fin uss ha quai – cun in'excepziun – mo pertutgà persunas sur 80 onns. Quai è da leger en il nov rapport emnil da l'Uffizi federal da sanadad BAG.
19 persunas èn mortas dapi ils 27 da schaner da quest onn, malgrà ch'ellas eran vaccinadas duas giadas, pia cumplainamain. Da las total 460 persunas ch'eran vaccinadas cumplainamain, e tuttina infectadas cun corona, han 96 stuì ir en ospital.
Protecziun cunter decurs grev
Er cun resguardar ina cifra nunenconuschenta auta, saja il dumber da cas tar persunas vaccinadas cumplainamain probablamain anc adina entaifer il dumber ch'è stà da spetgar tenor studis. Tenor quels studis è l'effectivitad dals dus vaccins lubids en Svizra da Moderna e Pfizer/Biontech tar 94% fin 95%.
La virola cun quels vaccins protegia uschia cun auta effectivitad d'ina infecziun sintomatica cun las variantas ch'i dat fin uss dal coronavirus en Svizra, sco er d'in decurs grev da la malsogna.
