La Svizra na saja anc betg pronta per las pli novas schluccadas da la crisa da corona. I manchia anc adina in sistem da surveglianza che funcziunia per l'entira Svizra, ha ditg Egger en in'intervista cun la «NZZ am Sonntag», la «Sonntagszeitung» ed il «SonntagsBlick».
Plinavant na saja anc betg cler quant etablì ch'il contact tracing saja. Ord vista scientifica sajan las novas schluccadas ristgadas e la situaziun possia escalar sch'il dumber da cas creschia puspè.
Venderdi aveva il Cussegl federal decidì che l'ura da polizia croda davent, la distanza da 2 meters po vegnir scursanida sin 1,5 meters ed occurrenzas fin 1'000 persunas èn puspè lubidas.
Augment dals cas
Il curs ch'il dumber da cas haja prendì durant l'epidemia saja fitg legraivel, ha ditg Egger. I saja gartegià da reducir a moda marcanta il dumber da cas. Las ultimas duas emnas èn las cifras dentant puspè creschidas. La cifra da reproducziun è puspè tar dapli che 1. Perquai dettia il privel ch'i dat puspè dapli cas. En questa situaziun malsegira saja la task-force da l'avis ch'ils ulteriurs pass per schluccadas sajan memia baud.
L'augment da cas saja da manar enavos sin las schluccadas dals 11 da matg. Las consequenzas da las schluccadas dals 28 da matg, ils 6 da zercladur ed ils 15 da zercladur na sajan anc betg cleras.
Chantuns èn dumandads
Cun quai discurra Egger er da la colliaziun tranter testar, contact-tracing e quarantina en ils chantuns sco era il rimnar datas che fan pussaivel da suandar l'epidemia.
Nus stuain savair, nua exact che cas cumparan e sche auters cas pon vegnir colliads cun quai.
La capacitad per testar saja avant maun ed ils ultims dis saja vegnì testà fitg bler. Impurtant saja en l'avegnir da testar svelt e tant sco pussaivel tar ina proxima situaziun da ristg, per pudair scuvrir las chadainas d'infecziun e pudair interrumper quellas. Sch'i dettia lura in suspect, saja da testar betg be ils contacts stretgs, ma l'entir conturn.
Cun las novas schluccadas essan nus bainbaud ad in punct nua ch'in obligatori da purtar mascras sto vegnir introducì.
