Siglir tar il cuntegn

Header

cuntegn

Crisa da corona en Svizra Koch: «Nus essan sur il culm, sch'igl è l'ultim culm»

La Svizra dumbra anc adina tranter 500 e 700 novs cas da corona a di. La tendenza mussia dentant engiu, ha ditg Daniel Koch, il delegà dal BAG per Covid-19 davant las medias. Nus sajan sur il culm, sche quai saja l'ultim culm. Nagin sappia quant ferm ch'ins possia schluccar las mesiras senza ristgar ina segunda unda, uschia Koch. En scadin cas vegnia il Cussegl federal a ponderar fitg bain e resguardar tut il pussaivel e lura communitgar in urari probabel.

video
Koch davart schluccar mesiras
Or da News-Clip dals 11.04.2020.
laschar ir. Durada: 45 Secundas.

Economia pertutgà pli fitg

La situaziun da l'economia svizra è sa pegiurada pli ferm che quai ch'ins haja spetgà l'entschatta da la crisa da corona, ha ditg Eric Scheidegger dal Secretariat da stadi per l'economia. In quart da la producziun saja crudà davent, tar il commerzi en detagl ed en la branscha da transport sajan ids a perder fin uss 50 fin 60 % da la productivitad ed en la gastronomia saja quella sa reducida per 80%. Il Seco quinta perquai cun ina recessiun pli greva che spetgà. Il product naziunal brut pudess sa sminuir per 7 fin 10%.

video
Scheidegger davart il svilup economic
Or da News-Clip dals 11.04.2020.
laschar ir. Durada: 35 Secundas.

Armada vul reducir contingent

Davent da l'emna proxima vul l'armada reducir il dumber da schuldads ch'èn en servetsch en il cumbat cunter Covid-19. Ins veglia discutar co ins possia meglierar l'equiliber tranter resursas e dumonda, ha ditg il brigadier Raynald Droz avant las medias a Berna. Suenter Pasca pon ils schuldads far vacanzas e per part era far servetsch da pichet. Mobilisà ha l'armada 5'000 schuldads, mo ina part è dentant era propi en acziun.

RTR novitads 16:00

Artitgels legids il pli savens